१२ वर्षे बालकले आफ्नै आमाको गोली हानेर हत्या

लिम्वूवान डट व्लगस्पोट डटकम,काठमाडौं

संयुक्तराज्य अमेरिकाकाको अदालतले एक १२ वर्षे बालकलाई आफ्नै आमाको गोली हानेर हत्या गरेको अभियोगको दोषी ठहर्‍याएको छ । घरेलु कामकाजका विषयमा आमाछोराको विवाद भएपछि १२ वर्षे छोराले एक वर्षअगाडि आमाको गोली हानी हत्या गरेका हुन् । उनले आमालाई लगातार आठवटा गोली हानेका थिए । एरिजोनाको अदालतका अनुसार १२ वर्षे बालकले आमा सारा म्याडि्रडलाई जानीबुझेर नै गोली हानेर मारेको वकिलहरूले प्रमाणित गरेका छन् । कम उमेरका भएकाले बालकको पहिचान गोप्य राखिएको छ । यी बालकलाई बाल अपराधीका रूपमा राखिएको थियो । उनीविरुद्ध २३ जनवरीमा सजाय सुनाइनेछ । घरेलु कामकाजका विषयमा आमा र छोराको भनाभन भएपछि छोराले आमालाई गोली हानेर मारेको बताइएको छ । सुत्ने कोठाको दराजबाट बन्दुक झिकेर ती बालकले आमा सारा म्याडि्रडलाई लगातार आठपटक गोली हाने । साराका १० वर्षदेखिका ब्वाइफ्रेन्ड अल्फोन्सो मुन्जोले बालकले आमालाई गोली हानेपछि खाली बन्दुक आफूलाई दिएको बताएका छन् । बालकलाई आपत्कालीन स्थितिमा बन्दुक चलाउन आफूले नै सिकाएको मुन्जोले बताएका छन् । आमाको हत्या गर्ने बालकको कुनै मनसाय नभएको उनका वकिलले बताएका छन् । आफूलाई आमाले बारम्बार हप्काउने र थप्पड हान्ने गरेको बालकले बताएका छन् । सरकारी वकिल बालकलाई बालिग भएपछि मात्र मुद्दा चलाउन चाहन्थे । तर, मनोचिकित्सकको रिपोर्ट आएपछि न्यायाधीशले यस मुद्दाको सुनुवाई बाल न्यायालयको अधीनमा हुने फैसला गरे । मनोचिकित्सकका अनुसार बालकलाई आमाको गालीको शाब्दिक तथा शारीरिक असर परेको छ । बालअपराध न्याय-प्रणालीअन्तर्गत बालकलाई सुधार्न सकिने पनि बताइएको छ । एरिजोनाको कानुनअनुसार बालकलाई १८ वर्षसम्म मात्र बालसुधार-गृहमा राख्न सकिन्छ ।