नयाँ संविधानका लागि बिज्ञहरुसँग परामर्श लिनेक्रममा छलफल

लिम्वूवान डट व्लगस्पोट डटकम,काठमाडौं

नयाँ संविधानका लागि बिज्ञहरुसँग परामर्श लिनेक्रममा संविधानसभा अन्तर्गतको संवैधानिक समितिले २०४७ को संविधानका मस्यौदाकारहरुसँग छलफल गरेको छ । संविधानसभाको संवैधानिक समितिले संविधान निर्माणबिज्ञहरुसँग परामर्श गर्नेक्रममा २०४७ सालको संविधानका निर्माताहरुसँग परामर्श थालेको छ । माघ १३ गते सिंहदरवारस्थित समितिको कार्यालयमा २०४७ सालको संविधानका मस्यौदाकारहरु सुर्यनाथ उपाध्याय, भरतमोहन अधिकारी लक्ष्मणप्रसाद अर्यालयसँग समितिका अध्यक्ष र सदस्यहरुले संविधान निर्माणबारे छलफल गरे । समितिका अध्यक्ष र सदस्यहरुसँग २०४७ सालको संविधानका मस्यौदाकार उपाध्यायले आफूहरुले ०४७ को संविधान बन्दा दिएका धेरै सुझाव कार्यान्वयन नभएको दावी गरे भने त्यसबेलाका अर्का मस्यौदाकार तथा एमाले नेता भरतमोहन अधिकारीले मुलुक संघीयतामा जाने निश्चित भएकाले नयाँ संविधानमा विकेन्द्रीकरण ब्यवहारिक हुनुपर्ने उल्लेख गरे । अर्का मस्यौदाकार अर्यालले महिला, दलित, अपाङ्गका समस्यालाई ध्यान दिएर संविधान बनाउनुपर्ने धारणा राखे ।