सरकार ढल्ने सपना नदेख्न प्रधानमन्त्रीको चेतावनी

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहालले सचिवहरूलाई सरकार ढल्ने सपना देखेर विगतमा जस्तो आफ्नो कामप्रति ढिलासुस्ती नगर्न निर्देशन दिनुभएको छ । प्रधानमन्त्री दाहालले आइतबार गरेको सम्बोधनमा व्यक्त प्रतिबद्धता कार्यान्यन गराउन सवै सचिवलाई सोमबार बोलाएर उक्त निर्देशन दिनुभएको हो ।प्रधानमन्त्रीले सचिवहरूलाई "सरकार ढल्छ" भन्ने मानसिकता तत्काल हटाउन आग्रह गर्दै भन्नुभयो- 'सरकार ढल्छ भन्ने मानसिकता तत्काल आउट गरेर काम गर्नुहोस् । उहाँले शान्ति प्रक्रियालाई तार्किक निष्कर्षमा नपुर्‍याउँदासम्म र नयाँ संविधान नलेखिंदासम्म सरकार कसैले चाहेर पनि ढलाउन सक्दैन भन्दै सरकार नयाँ संविधान बनाएपछि हुने चुनावपछि मात्र ढल्ने बताउनुभयो ।सम्बोधनमा व्यक्त प्रतिबद्धताको मर्म र भावना अत्यन्तै संवेदनशलि भएको सचिवहरूलाई स्पष्ट पार्दै उहाँले भन्नुभयो- 'जनतालाई झुक्याउन यो प्रतिबद्धता व्यक्त गरिएको होइन, त्यसैले तपाईंहरू आजैदेखि कार्यान्वयन गर्नतिर लाग्नोस् । उहाँले मालपोत र भुमिसुधारलगायतका क्षेत्रमा हुने ढिलासुस्ती तत्काल हटाउन निर्देशन दिँदै भन्नुभयो- हामी जीवनमरणको क्षणमा छौँ, त्यसैले तपाईंहरू आआफ्नो मन्त्रालय र कार्यालयमा डटेर काम गर्नुहोस, तपाईंहरूको पनि इतिहासको पानामा नाम लेखिने छ ।सबै सचिवले सरकारको निर्दशनअनुसार इमान्दारीका साथ काम गर्ने प्रतिबद्धता गरेका थिए । उनीहरूले प्रधानमन्त्रीको सम्बोधनमा व्यक्त प्रतिबद्धता नयाँ नेपाल निर्माणका लागि कोसेढुंगा साबित भएकाले जसरी पनि पुरा गर्ने अठोट पनि व्यक्त गरे ।