तमलोपाद्वारा दोस्रो चरणको आन्दोलन घोषणा

लिम्वूवान डट व्लगस्पोट डटकम,काठमाडौं

तराई मधेस लोकतान्त्रिक पार्टीले दोस्रो चरणको आन्दोलनका कार्यक्रम घोषणा गरेको छ ।मधेसवादी दल र तत्कालीन सरकारकाबीचमा वि.सं २०६४ फागुन १६ गते भएको मधेससम्बन्धी सम्झौताको कार्यान्वयनमा ढिलाई भएको भन्दै विगत केही दिनदेखि आन्दोलनलाई निरन्तरता दिन दोस्रो चरणको आन्दोलन घोषणा गरेको हो ।यही माघ १४ गते सुरुभई बिहीबार सम्पन्न सो पार्टीको केन्द्रीय कार्यसमितिको बैठकद्वारा पारित आन्दोलनका कार्यक्रममा तराई क्षेत्रमा बन्द विरोध एवम् हड्ताललगायतका दबाबमूलक कार्यक्रमहरू रहेका छन् ।यही माघ २३ गतेदेखि शुरुभई फागुन १६ सम्म सञ्चालन हुने कार्यक्रममा सो पार्टीका युवा एवम् महिला सङ्गठनको सहभागितामा कोणसभा विरोध जुलुस एवम् शान्तिपूर्ण बन्दका कार्यक्रम रहेको सो पार्टीद्वारा जारी विज्ञप्तिमा जनाईएको छ । यसैगरी आजै सम्पन्न केन्द्रीय समितिको वैठकले मधेसवादी दलसमेत सम्मिलित सरकारका प्रधानमन्त्री पुष्पकमल दाहाल प्रचण्डले यही माघ १२ गते गर्नुभएको सम्बोधनमा हाल आन्दोलित तराई मधेश र त्यहाँ जनताको समस्याका बारेमा कुनै सम्बोधन नगरिनु दुर्भाग्यपूर्ण भएको ठहर पनि सो बैठकले गरेको विज्ञप्तिमा जनाईएको छ । बैठकले संविधान लेखनको कार्यमा सक्रिय सहभागिता जनाउन रामचन्द्र कुशवाहाको संयोजकत्वमा पाच सदस्यीय समिति गठन गरेको छ भने धनुषा र मोरङमा आगामी चैत २८ गते हुने निर्वाचन सञ्चालनका लागि हृदयेश त्रिपाठीको संयोजकत्वमा १७ सदस्यीय उपनिर्वाचन परिचालन समिति गठन गरेको छ ।