अफगानिस्तानमा भएको आत्मघाती आक्रमणमा कम्तिमा २२ को मृत्यु

लिम्वूवान डट व्लगस्पोट डटकम,काठमाडौं 

काबुल (अफगानिस्तान), जेठ २४ (एजेन्सी)-दक्षिणी अफगानिस्तानको वजारमा बुधबार भएका दुई विस्फोटमा परी कम्तिमा २२ जनाको मृत्यु भएको छ भने ५० जना जति घाइते भएको अधिकारीहरूले बताएका छन्। ससाना पसलहरू नजिकै अमेरिकाको नेतृत्वमा रहेको गठबन्धन सेनाको कन्दाहार एयर फिल्डमा रसद पुर्‍याउने ट्रकहरू रोकिराख्ने स्थानमा भएको उक्त विस्फोटको जिम्मेवारी तालिबानले लिएको छ। वम वोकेको व्यक्तिले पहिला आफ्नो मोटरसाइकलमा विस्फोट गराएको थियो। त्यसपछि मानिसहरू हताहत भएकाको उद्धारका लागि आए। त्यतिनै बेला उसँगै भएको अर्को बम विस्फोट भएको कान्दाहार क्षेत्रका प्रवक्ता जावेद फैजलले बताए। उनले दुबै विस्फोटमा परी २२ जनाको मृत्यु भएको तथा ५० जना घाइते भएको बताए। मृतक सबै साधारण नागरिक भएको उनले बताए। तालिवानका प्रवक्ता कारी युसुफ अहमदीले त्यो आक्रमणको जिम्मेवारी लिएका छन्। उक्त विस्फोट अफगान सेनाको शिविरभन्दा लगभग ५ सय मिटर पर भएको थियो।