माओवादी अध्यक्ष पुष्पकमल दाहालले खुलामञ्चमा सम्बोधन

लिम्वूवान डट व्लगस्पोट डटकम,काठमाडौं 

अषाढ १ - माओवादी अध्यक्ष पुष्पकमल दाहालले खुलामञ्चमा सम्बोधन गर्दै आफू कसैलाई गाली गर्ने पक्षमा नरहेको बताए । उनले माओवादीले संघीयता र पहिचान छोड्न नसक्ने पनि बताए । दलहरुबीच नेताहरुको नामै किटेर आरोप प्रत्यारोप भइरहेको बेला दाहालले भने केही लाक्षणिक कुराहरु मात्र गरे । उनले सहमतिको आवश्यकता औल्यौंदै गाली नगर्ने नै बताए । तर, उनले परिवर्तन नचाहनेहरुले संविधान बन्न नदिएको आरोप भने लगाए । उनले भने, ‘हामीले संविधान निर्माणका लागि धेरै विषयमा सम्झौता गर्‍यौं तर संघीयता र पहिचानमा समेत सम्झौता गरेको भए म मात्रै होइन हाम्रो पार्टी नै सिद्धिने खतरा थियो ।’ उनले जेठ २६ गतेको २६ दलको आमसभा र २७ गतेको राप्रपा नेपालको सभाप्रति लक्ष्य गर्दै भने, ‘उहाँहरुले गाएको र माओवादीले सुसेलेको के कति अन्तर छ, बुझिदिए पुग्छ ।’ ‘हामीले साँच्चै गायौं भने कस्तो होला ?’ उनको प्रश्न थियो । जेठ १४ ले परिवर्तनकारी शक्ति र परिवर्तन नचाहने बीचको कित्ता छुट्याएको उनको भनाई थियो । कांग्रेस र एमालेप्रति लक्ष्य गर्दै दाहालले एकात्मक सामन्तवादी सोच भएकाहरूले संविधान बन्न नदिएको अरोप लगाए । नेपाली सेनाका विषयमा आफूले भन्दै नभनेको कुरा बाहिर आएकोमा बताउँदै दाहालले नेपाली सेना अब गणतन्त्रवादी सेना भएको कथन दोहोर्‍याए । आफूले यो सेना शाही सेना नरहेको र सेनालाई विश्वास गरेर नै लडाकु समायोजन गरेको बताए । उनले प्रश्न गरे, 'मुलुकको सेना एउटा पार्टीको सेना कसरी हुन् सक्छ ? अर्को प्रसङ्गमा दाहालले सहमतिको विकल्प नभएको पनि दोहोर्‍याए । उलने आफ्नै पार्टीका असन्तुष्ट पक्ष र विपक्षी पार्टीलाई समेत एकै ठाउँमा आउन आग्रह गरे, त्यसका लागि आफू जस्तोसुकै त्याग गर्न पनि तयार भएको बताए । आफ्नो यो आह्वान देशको उन्नतिका लागि र जनताको प्रगतिका लागि भएको पनि उनले बताए ।