संविधान बनाउन नसकेकोमा भट्टराईले माफी मागे

लिम्वूवान डट व्लगस्पोट डटकम,काठमाडौं 

अषाढ १ - प्रधानमन्त्री बाबुराम भट्टराईले खुलामञ्चमा आयोजित सभालाई सम्बोधन गर्दै जेठ १४ संविधान जारी गर्न नसकेकोमा सरकार प्रमुखका तर्फबाट माफी मागे । संविधान जारी गर्ने जिम्मेवारी तपाईहरुले दिनु भएकै हो भन्दै भट्टराईले नौ महिनासम्म कोखमा बोकेकी महिलाले जीवित सन्तान जन्माउन नसक्दा जुन पीडाको अनुभूति गर्छिन् त्यस्तै अनुभूति आफूले गरेको बताए । भट्टराईले संविधान बन्न नसकेको अवस्थामा निर्वाचन घोषणा गर्नुको विकल्प नभएको बताए । चुनावको घोषणा असंवैधानिक भयो भन्ने राजनीतिक पार्टीहरू माघ १८ र असोज १९ दोहोर्‍याउन राष्ट्रपतिलाई उक्साइ रहेका छन्, यो कुन संवैधानिक बाटो हो भन्दै प्रतिप्रश्न गरे । उनले राष्ट्रपतिको सचेतता प्रति खुसी व्यक्त गरे । ‘बुद्धिमान मानिसले एउटा गाडी बिग्रियो भने अर्को गाडी खोजेर भए पनि गन्तव्यमा पुग्छन्, त्यसैले आउनुहोस् हामी पुनः सहमति गरेर अगाडि बढौं,’भट्टराईले भने । उनले ठुस्किएर गएका साथीहरुलाई पुनः सहमतिमा आउन आग्रहग गरे । राष्ट्रिय सहमति बिना निकास सम्भव छैन भन्दै भट्टराईले सबै दललाई एकै ठाउँमा आउनसमेत आग्रह पनि गरे ।