सेनाका नायक गोलीसहित पक्राउ

लिम्वूवान डट व्लगस्पोट डटकम,काठमाडौं 

भक्तपुर, असार १६ - नेपाली सेनाका नायकलाई ३२ राउण्ड गोलीसहित प्रहरीले पक्राउ गरेको छ । दघिकोट मध्यपुरठिमी नगरपालिका-१३ नयाँठिमी बस्ने दोलखा बुलुङ घर भएका २६ वर्षीय नायक राजु विकलाई ९ एमएम पेस्तोलको ३२ राउण्ड गोलीसहित पक्राउ गरेको प्रहरी प्रधान कार्यालयले जनाएको छ । उनलाई दधिकोट ९ बाट हिँडिरहेको बेला नियन्त्रणमा लिएको प्रहरीले जनाएको छ । प्रहरीका अनुसार उनी सेनाको विद्युत् तथा यान्त्रिक सेवा निर्देशनालय दरबन्दी भई सुन्दरीजलमा कार्यरत छन् । उनलाई शनिबार साढे १२ बजे विशेष सूचनाको आधारमा प्रहरीले पक्राउ गरेको हो । उनलाई शनिबार नै कारबाहीको लागि सेनालाई जिम्मा लगाएको प्रहरी स्रोतले जनाएको छ । 'विशेष सूचनाको आधारमा हिँडिरहेका बेला खान्तलासी गर्दा उनको साथबाट गोली बरामद भयो,' स्रोतले भन्यो, 'कोठा खन्तलासी गर्दा केही भेटिएन ।' सेनाका कर्मचारी भए पनि गोली बोकेर हिँड्नु अवैध भएको एक प्रहरी अधिकृतले बताए ।