वाइसिएलले चार शिक्षक कुटेपछि विद्यालय बन्द

लिम्वूवान डट व्लगस्पोट डटकम,काठमाडौं

बाग्लुङ,वैशाख ९- परीक्षाफल प्रकाशित गर्दा नाम छुटेको विषयलाई लिएर वाइसिएल कार्यकर्ताले चार शिक्षक कुटेपछि त्यसको विरोधमा बिहीबारदेखि लेखानी उच्च मावि बन्द भएको छ। विद्यालय बन्द भएपछि सो विद्यालयमा अध्ययन गर्ने करिव ४ सय विद्यार्थीको पढाई प्रभावित भएको छ।
शैक्षिक संस्थामा प्रवेश गरी कुटपिटमा संलग्नलाई कारबाहीको माग गर्दै विद्यालय बन्द गरेको शिक्षक हिमानन्द कँडेलले बताए। 'शिक्षक-विद्यार्थी सुरक्षित हुने अवस्था रहेन, विद्यार्थीसमेत त्रसित छन्। दोषीलाई कारवाही हुनुपर्छ'- कँडेलले भने।बुधबार वाइसिएल कार्यकर्ता नरबहादुर क्षेत्रीको नेतृत्वमा गएको समूहले शिक्षकलाई कुटपिट गरेको विद्यालयले जनाएको छ। कुटपिटबाट उच्च माविका प्राचार्य विष्णुदत्त सुवेदी, शिक्षक खिमानन्द कंडेल, खगराज कँडेल, देवीप्रसाद गौतम घाइते भएका थिए।वाइसिएल कार्यकर्ताले अफिस कोठामा प्रवेश गरी रेडियो, कम्युटर तोडफोड र कागजातसमेत च्यातेको प्रअ सुवेदीले बताए।क्षेत्रीले भने शिक्षकले आफूलाई चाहिँ आक्रमण गरेको बताए ।कुटपिटको विषयलाई लिएर शिक्षकहरुको एक टोली जिल्ला शिक्षा कार्यालय बाग्लुङमा पुगेको छ।