विश्वविद्यालय आन्दोलनले यातायात ठप्प

लिम्वूवान डट व्लगस्पोट डटकम,काठमाडौं

सुर्खेत, वैशाख ११- मध्यपश्चिमाञ्चल विश्वविद्यालयसम्वन्धी व्यवस्थापिका संसदमा दर्ता भएको विधेयक फिर्ता लिने सरकारी निर्णयविरुद्ध सञ्चालित आन्दोलनका कारण शनिबार सुर्खेतकौ यातायात ठप्प भएको छ। विश्वविद्यालय स्थापना सङ्घर्ष समितिले शनिबार र आइतबार दुई दिन यातायात बन्द आह्वान गरेको थियो।
सङ्घर्ष समितिले आह्वान गरेको बन्दका कारण सुर्खेतबाट बाहिर जाने र बाहिरबाट सुर्खेत भित्रिने सबै सवारी साधन ठप्प भए। उपत्यकामा पनि सवारी साधन गुडेका छैनन्। सङ्घर्ष समितिले स्थानीयले स्वस्फूर्तरुपमा यातायात बन्दमा साथ दिएको जनाएको छ। समितिका सचिव महेन्द्रकुमार मल्लले भने- जनताले अरुबेला आयोजित बन्दमा जस्तो डर र त्रासका कारण बन्द गरेका छैनन्, विश्वविद्यालयप्रतिको चिन्ताले आफैं बन्द गरेका छन्।' माग सम्वोधन नभए बन्द भोलि पनि जारी रहने मल्लले बताए।विश्वविद्यालय सङ्घर्ष समितिले तेस्रो चरणको आन्दोलनअन्तर्गत यसअघि शैक्षिक संस्था बन्द, बजार बन्द, सरकारी तथा गैरसरकारी कार्यालय बन्द गरिसकेको छ। सरकारले विश्वविद्यालयसम्वन्धीसम्बन्धी दर्ता भएको विधेयक फिर्ता लिने निर्णय नसच्याए १५ गतेदेखि अनिश्चितकालीन आमहड्ताल गर्ने घौषणा गरिएको छ। त्यस्तो स्थिति आएमा समग्र मध्यपश्चिमको जनजीवन प्रभावित हुने स्थानीय बताउँछन्। 'मध्यपश्चिमका पहाडी जिल्लाहरुको प्रमुख मार्गका रुपमा रहेको सुर्खेतमा आमहड्ताल भएमा त्यसको सोझो मार पहाडी जिल्लाका बासिन्दाले पनि भोग्नुपर्नेछ,' विश्वविद्यालय स्थापना सङ्घर्ष समितिका प्रचार संयोजक गोविन्द कोइरालाले भने- त्यसैले हामी सरकारले समयमै समस्या समाधान गरोस् भन्ने चाहन्छौं।