श्रीलंकामा प्रहरीले चुम्बन गर्ने दुई सय जोडीलाई पक्राउ

लिम्वूवान डट व्लगस्पोट डटकम,काठमाडौं
कोलम्बो/ श्रीलंकामा सार्वजनिक स्थलमा अशोभनीय व्यवहार देखाएको आरोपमा प्रहरीले दुई सय जोडीलाई हिरासतमा लिएको छ　। युवा जोडीले सार्वजनिक स्थलमा चुम्बन गरेको आरोप स्थानीय बासिन्दाले लगाएपछि प्रहरीले दुई सय युवा जोडीलाई पक्राउ गरेको हो　। प्रत्यक्षदर्शीका अनुसार युवा जोडीले सार्वजनिक स्थलमा चुम्बन गर्ने, एक-अर्काको हात समात्ने र अँगालो हाल्ने गर्छन्　। पछिल्लो साता कुरुनेगाला सहरबाट प्रहरीले तीन सय ५० युवालाई हिरासतमा लिएको थियो　। दक्षिणी सहर मताराबाट पनि प्रहरीले २२ जोडीलाई गिरफ्तार गरेको छ　। पक्राउ परेका युवा जोडीलाई शुक्रबार अदालत पेस गरिनेछ　।
प्रहरीका अनुसार स्थानीय मानिस सयौँ युवायुवतीको सार्वजनिक स्थलमा अनुचित क्रियाकलापदेखि हैरान छन्　। कुरुनेगाला युवाको मुख्य केन्द्र मानिन्छ　। प्रत्यक्षदर्शीका अनुसार सयौँ युवा जोडी बसपार्क र पार्कमा हात समातेर, अँगालो मार्दै हिँड्छन्　। यस मामलामा सामेल अधिकांश महिला स्कुले छात्रा छन्　। उनीहरू करिब १५ वर्ष उमेर समूहको भएको बताइएको छ　। गत साता पक्राउ परेका जोडीलाई आइन्दा यस्तो क्रियाकलाप नगर्ने चेतावनी दिएर बाबुआमाका साथमा छाडिएको छ　।