गोठाटारमा गोली चल्यो, एक बालकको मृत्यु, दुई घाइते

लिम्वूवान डट व्लगस्पोट डटकम,काठमाडौं
२० जनवरी,२०१०,काठमाडौंको गोठाटारस्थित काँडाघारीमा आज बुधबार बिहान हतियारधारी समूहले प्रहार गरेको गोली लागि एक बालकको मृत्यु भएको छ भने अन्य दुई जना घाइते भएका छन् । गोठाटार-७ स्थित बाटोमा निर्माण सामाग्री थुपारेको बिषयमा विवाद हुँदा आज बिहान साँढे दश बजेतिर गाउँ बाहिरबाट गएको हतियारधारी समूहले चलाएको गोली लागि स्थानीय ८ बर्षो बालक सन्तोष कार्कीको मृत्यु भएको हो । अर्का घाइते राजाराम थापा र गजेन्द्र थापा गम्भीर घाइते भएका छन् । गम्भीर घाइते थापाद्वयको बीएण्डबी अस्पतालमा उपचार भईरहेको प्रहरीले जनाएको छ । रत्न लामाले आफ्नो निर्माणाधीन घर अगाडिको बाटोमा गिट्टी थुपारेको बिषयमा स्थानीयबासीसँग विवाद बढेपछि गाउँ बाहिरबाट गएको हतियारधारी समूहले स्थानीयबासीहरुमाथि अन्धाधुन्ध गोली प्रहार गरेको स्थानीय बासिन्दाहरुले बताएका छन् । प्रहरीले उक्त घटनामा संलग्न रत्न लामाका छोरा पाल्टेन लामा र फुर्वा लामालाई चाइनिज पेस्तोलसहित पक्राउ गरेको छ । हतियारधारी समूह चढेर आएको दुई वटा मोटरसाइकल स्थानीय बासिन्दाहरुले जलाएका छन् ।