डाउनलिंक अनुमति नलिएका च्यानल बन्द गर्न निर्देशन

लिम्वूवान डट व्लगस्पोट डटकम,काठमाडौं

२५ असोज,सरकारले डाउनलिंक अनुमति नलिई नेपालभित्र कार्यक्रम प्रसारण गरिरहेका विदेशी संस्थाको प्रसारणमा प्रतिबन्ध लगाउन स्थानीय प्रशासनलाई निर्देशन दिएको छ । विदेशी प्रसारण संस्थाको अनधिकृत र अश्लील प्रसारण रोक्न सञ्चार मन्त्रालयले गृह मन्त्रालयमार्फत ७५ जिल्लाका प्रमुख जिल्ला अधिकारीलाई त्यस्तो निर्देशन दिएको हो । कसैले अनुमति नलिई कार्यक्रम प्रसारण गरे/गराए त्यसमाथि स्थानीय प्रशासनले रोक लगाउने कानुनी व्यवस्था छ । सञ्चार मन्त्रालयले हालसम्म ९५ विदेशी प्रसारण संस्थालाई कार्यक्रम डाउनलिंक गरी प्रसारण अनुमति दिएको छ । केबल टेलिभिजन सञ्चालकले अहिलेसम्म देशभर विभिन्न मुलुकका करिब १ सय २५ च्यानललाई नेपालमा डाउनलिंक गरी दर्शकमाझ पुर्‍याएको तथ्यांक मन्त्रालयलाई उपलब्ध गराएका छन् । तर, अहिलेसम्म ९७ च्यानलले मात्रै डाउनलिंक अनुमतिका लागि सञ्चार मन्त्रालयमा निवेदन दिएका छन् ।
मन्त्रालयले सोमबार आयोजना गरेको पत्रकार सम्मेलनमा मन्त्रालयका सहसचिव महेन्द्र गुरागाईंले कुनै पनि विदेशी संस्थाले डाउनलिंक अनुमति नलिई प्रसारण गरेको पाइए जुनसुकै वेला त्यस्तो प्रसारणमाथि प्रतिबन्ध लगाइने बताए । 'डाउनलिंकको अनुमति नलिई प्रसारण भइरहेका च्यानलको अनुगमन गरिरहेका छौँ,' उनले भने, 'दसँैपछि अनधिकृत प्रसारणमाथि पूर्ण रूपमा प्रतिबन्ध लगाउँछाँै ।' उनले ४ महिनाभित्रमा त्यस्तो प्रसारण व्यवस्थित बनाइने दाबी गरे । कसैले अनुमति नलिई कार्यक्रम प्रसारण गरे प्रसारण सामग्री जफतलगायत हदैसम्मको कारबाही गर्न सक्ने कानुनी व्यवस्था छ । अनुमतिका लागि विज्ञापनसहित प्रसारण गर्न चाहने पेई च्यानलले प्रतिवर्ष ५० हजार रुपैयाँ र विज्ञापनरहित नन्पेई च्यानलले भने २५ हजार रुपैयाँ राजस्व सरकारलाई बुझाउनुपर्छ ।
सञ्चार मन्त्रालयले भारतबाट प्रसारित र भारतीयकै लगानी रहेको नेपाली भाषाको 'नेपाल वान' टेलिभिजनलाई पनि नेपालमा डाउनलिंक गरी प्रसारण अनुमति दिएको छैन । नेपाल वानका विषयमा छानबिन गर्न सञ्चार मन्त्रालयले सहसचिव महेन्द्र गुरागाइर्ंको अध्यक्षतामा गठन गरेको छानबिन समितिले नेपाल वान टेलिभिजनसँग जोडिएका केही विषय टुंग्याएर मात्रै डाउनलिंकको अनुमति दिन सुझाब दिएको थियो । समितिले भारतबाट प्रसारण भए पनि टेलिभिजनले नेपालबाट प्रसारण भएजस्तो भाषा-शैली प्रयोग गरेर दर्शकलाई भ्रममा पारेको, विदेशी लगानी र विदेशबाटै प्रसारण भए पनि नेपालको नाम टेलिभिजनको लोगोमै राखेकोलगायत विषय नटुंगिएसम्म अनुमति नदिन सुझाब दिएको हो ।
मन्त्रालयका अनुसार डिस्कभरी च्यानल, एनिमल प्लानेट, डिस्कभरी ट्राभल्स एन्ड लिभिङ, डिस्कभरी साइन्स, टेन स्पोर्ट, सहारा वान, सहारा फ्यामेली, बिबिसी वल्र्ड न्युज, एनडी टिभी-२४, एनडी टिभी प्रोफिट, एचबिओ, सिनेम्याक्स, नाइन एक्स-एम, नेसनल जोग्राफी, फक्स हिस्ट्री एन्ड इन्टरटेनमेन्ट, दि एमजिएम, आजतक, हेडलाइन टुडे, इएसपिएन, स्टार स्पोर्टस्लगायत च्यानलाई डाउनलिंक अनुमति दिएको छ ।