कांग्रेस विधान संशोधनमा देउवाको असहमति

लिम्वूवान डट व्लगस्पोट डटकम,काठमाडौं

११ कात्तिक,पार्टीको पहिलो बैठकमा नै विधान संशोधनका लागि समिति गठन भएपछि सभापतिमा पराजित नेता शेरबहादुर देउवाले असहमति जनाएका छन्　। बिहीबार विधान संशोधनका लागि भएको छलफलमा भाग लिँदै नेता देउवाले तत्काल विधान संशोधन गर्न नहुने धारणा राखेका हुन्　। देउवाले महासमितिको बैठकले हालै तयार पारेको विधान कार्यान्वयन नै नगरी संशोधन गर्न नहुने भन्दै एकपटक सो विधानलाई पूर्ण रूपमा कार्यान्वयन गर्नुपर्ने धारणा राखेका थिए　। विधानलाई पूर्ण रूपमा लागू गरेपछि मात्र समस्या र कठिनाइ आँैल्याउन सकिने भन्दै महाधिवेशनको बन्दसत्रमा सीमित सदस्य र जिल्ला सभापतिले गरेको आग्रहका भरमा विधान संशोधन गर्न नहुने जिकिर गरेको स्रोतको दाबी छ　।
महाधिवेशन सकिएको एक महिनापछि बिहीबारबाट पार्टी केन्द्रीय कार्यालय सानेपामा सुरु भएको कांग्रेस केन्द्रीय समितिको पहिलो बैठकले नीति तथा कार्यक्रम परिमार्जन, विधान संशोधन र पार्टीको नियमावली मस्यौदाका लागि तीनवटा छुट्टाछुट्टै समिति गठन गरेको छ　। महाधिवेशनको बन्दसत्रले नीति तथा कार्यक्रममाथि महाधिवेशन प्रतिनिधिले दिएको सुझाबलाई समेटेर पारित गर्न महेश आचार्यको संयोजकत्वमा एनपी साउद, दिलेन्द्रप्रसाद बडू, मनमोहन भट्टराई, रत्ना शेरचन, मिनाक्षी झा र महेन्द्र यादव सदस्य रहेको समिति गठन गरेको छ　। बैठकले विधान संशोधनका लागि कृष्णप्रसाद सिटौलाको संयोजकत्वमा दीपकुमार उपाध्याय र ज्ञानेन्द्रबहादुर कार्की सदस्य रहेको समिति गठन गरेको छ भने पार्टीको नियमावली मस्यौदाका लागि अर्जुननरसिंह केसीको संयोजकत्वमा आनन्दप्रसाद ढुंगाना, नवीन्द्रराज जोशी, पुष्पा भुसाल, र सुरेन्द्र पाण्डे सदस्य रहेको समिति गठन गरेको छ　। यस्तै बैठकले महाधिवेशनबाट पारित विभिन्न प्रस्ताव, निर्वाचन समितिको प्रतिवेदन, आर्थिक प्रतिवेदनका साथै भोजन तथा आवास समितिको प्रतिवेदनलाई पारित गरेको छ　। बैठकको प्रारम्भ गर्दै सभापति कोइरालाले पार्टीलाई एकताबद्ध बनाएर लैजाने प्रतिबद्धता जनाउँदै आगामी चुनौतीको सामना गर्ने गरी संगठन विस्तारमा लाग्न केन्द्रीय सदस्यलाई निर्देशनसमेत दिएका थिए　। कोइरालाले पार्टीलाई अनुशासित पार्टीका रूपमा अघि बढाउने प्रतिबद्धता व्यक्त गर्दै आगामी दिनमा कांग्रेस संस्थागत ढंगबाट अघि बढ्ने धारणा राखेका थिए　।