कांग्रेस नेताले घरजग्गा फिर्ता गराउन आन्दोलन गर्ने

लिम्वूवान डट व्लगस्पोट डटकम,काठमाडौं

युद्धकालमा लुटेको घरजग्गा अझैसम्म पनि फिर्ता नगरेको भन्दै माओवादी पिडित कांग्रेस नेताहरुले संर्घषका कार्यक्रम घोषणा गरेका छन् । काँग्रेस केन्द्रीय कार्यालय सानेपामा पत्रकार सम्मेलन गरेर कांग्रेस नेताहरुले संर्घषका कार्यक्रम घोषणा गरेका हुन् । माओवादीले सञ्चालन गरेको एक दशक लामो ससस्त्र द्धन्द्ध कालमा कब्जा गरिएका घर जग्गा अझै पनि फिर्ता नभएको भन्दै पिडित कांग्रेसीहरुले संघर्षका कार्यक्रम घोषणा गरेको हुन् ।
कांग्रेस लगायत प्रमुख दलहरुले माओवादी लडाकुको समायोजन र पुर्नस्थापनालाई मात्रै केन्द्रमा राखेको तर द्धन्द्धकालमा कब्जा भएका जग्गाको बिषयलाई नजरअन्दाज गरेको समेत आरोप लगाएका छन्। माओवादी पिडितका मुद्दा ओझेलमा पारेको भन्दै आन्दोलन घोषणा गरिएको पत्रकार सम्मेलनमा नेताहरुले जानकारी दिए । आन्दोलनका लागि कांग्रेस केन्द्रीय सदस्य केवि गुरुङको संयोजकत्वमा सर्घष समिति समेत घोषणा गरिएको छ। समितिमा विनयध्वज चन्द, नारायण गौतम, लीलाधर भण्डारी, ज्ञानेन्द्रराज आरण, हुमनाथ दवाडी, मुक्ति आचार्य, कमला राइ र भीमकुमारी बुढा सदस्य छन् ।
सम्पती फिर्ता गर्न प्रमुख दलका नेताहरुलाई ज्ञापन पत्र बुझाउने, जिल्ला जिल्लामा सम्पती फिर्ता गर्न माग गर्दै आमसभाहरु गर्ने लगायतका कार्यक्रम घोषणा गरिएका छन् । मागहरुमा उचित सम्वोधन नभए थप आन्दोलनका कार्यक्रम घोषणा गर्ने उनीहरुले चेतावनी समेत दिएका छन् । कांग्रेस नेता विनयध्वज चन्द्रको संयोजकत्वमा गठन भएको शान्ति प्रक्रिया एवं द्वन्द्वपिडित अनुगमन तथा समन्वय समितिले सार्वजनिक गरेको तथ्यांक अनुसार ८ हजार १ सय ७४ परिवारका करिव ६० हजार नागरिकले विस्तापनको सिकार भोगेका छन् भने ६ हजार ५७ परिवारको घरजग्गा अझै कब्जा गरिएको छ । एकीकृत माओवादीका अध्यक्ष पुष्पकमल दाहाल प्रधानमन्त्री भएको समयमै तीनमहिना भित्रै सम्पती फिर्ता गर्ने प्रतिबद्धता गरे पनि अहिलेसम्म युद्धकालममा कब्जा गरिएको सम्पती फिर्ता भएको छैन ।