गृह मन्त्रालय आफैंले राखेर मन्त्रिमण्डल विस्तारको तयारी

लिम्वूवान डट व्लगस्पोट डटकम,काठमाडौं

फाल्गुन ११ - प्रधानमन्त्री झलनाथ खनालले गृह मन्त्रालय आफैंले राखेर मन्त्रिमण्डल विस्तारको तयारी गरिरहेको एमालेका एक बरिष्ठ नेताले दाबी गरेका छन् । खनाल निकट एमाले सचिव यूवराज ज्ञवालीले गृहमन्त्रालय प्रधानमन्त्रीले आफैं राखेर भए पनि अब छिट्टै सरकारलाई पूर्णता दिने दाबी गरे । ‘मन्त्रालयको विवाद झिकेर शान्ति र संविधान निर्माण प्रक्रियालाई रोक्नु हुँदैन,’ उनले बुधबार राजधानीमा भने, ‘प्रधानमन्त्रीले गृहमन्त्रालय आफै राखेर सहमति हुन सक्छ ।’कांग्रेससहितका दलहरुले दुईदलीय अधिनायकबाट लाद्ने प्रयास भएको भनी गरिएको टिप्पणीप्रति लक्षित गर्दै ज्ञवालीले संसदीय प्रक्रियाबाट बनेको सरकारले अधिनायकबाद लाद्छ भन्नु संसदीय ब्यवस्थालाई नै अविश्वास गरेको ठहर्ने ज्ञवालीको भनाइ छ ।
माओवादी अध्यक्ष पुष्पकमल दाहाल र एमाले अध्यक्ष झलनाथ खनालबीच भएको सात बुँदे सहमतिले ध्रुविकरण भन्दा पनि सहमतिको बाटो खोलेको ज्ञवालीको जिकिर थियो । ‘शब्दको विवादमा अल्झनु भन्दा पनि यसले दिने परिणाममा अगाडि बढ्नुपर्छ,’ उनले थपे । सात बुँदे सहमतिअनुसार आफूले गृह मन्त्रालय पाउनुपर्ने दाबी माओवादीको छ । तर लडाकु र हतियार रहेको दललाई सुरक्षासम्बन्धि मन्त्रालय दिन नमिल्ने भन्दै एमालेले माओवादी दाबी अस्वीकार गरेको छ । गृह मन्त्रालयको हानाथापकै कारण मन्त्रिमण्डल विस्तार कठीन भएको छ ।