जसले ब्रायनलाई नेपाल बोलाए

लिम्वूवान डट व्लगस्पोट डटकम,काठमाडौं

फाल्गुन १४ - विश्व संगीत यात्रामा निस्केका क्यानेडेली रकगायक ब्रायन एडम्सलाई काठमाडौंमा ल्याइने जानकारी दिन गत पुसमा आयोजकले पत्रकार सम्मेलन गर्दा सञ्चारकर्मीले पत्याएनन् । अधिकांश सञ्चारकर्मीले 'ब्रायनसँग गरिएको सम्झौता देखाउन' भने । इभेन्ट आयोजनामा खासै दख्खल नभएका आयोजकले पनि पत्यारिलो प्रमाण पेस नगरी मौखिक रूपमा जानकारी दिइरहँदा केहीले 'यस्तो हावा कुरा कसरी पत्याउनु ? ब्रायनका नाममा 'ठगेर' धन कमाउने बठ्याइँ गर्न खोज्नु भा हो कि ? भने' तर पत्रकार सम्मेलन सकिएको ३७ दिनपछि (अघिल्लो शुक्रबार) तिनै नपत्याउने सञ्चारकर्मी नागरिकता र परिचयपत्रको फोटोकपी र फोटो बोकेर दरबारमार्गस्थित आयोजकको कार्यालयमा ब्रायन सुन्न पासका लागि धाइरहेका देखिए ।
सम्मेलनमा सहभागी सञ्चारकर्मीबाहेक प्रहरी, प्रशासन, कर्पोरेट हाउस र श्रोताले समेत नपत्याएको कन्सर्ट सफलतापूर्वक सम्पन्न गर्ने आयोजक (सीमान्त गुरुङ, सुरेशजंग रायमाझी, दीपेन्द्र अवाले, रविन गुरुङ र मीन केसी) बधाईका पात्र बनिरहेका छन् । जो ओडीसी नेटवर्क नामको संस्थामा आवद्ध छन् । यो फिल्म, संगीत र इभेन्टमा केन्दि्रत कार्यक्रम गर्छन् । करिब ५ करोड रुपैयाँको कारोबार भएको कन्सर्ट सफल भएपछि उनीहरूको हौसला चुलिँदै गएको छ । आगामी वर्षको दसैं नजिकिँदै गर्दा ब्रायन हाराहारीकै कलाकारलाई काठमाडौं ल्याउने उनीहरूले घोषणा गरिसकेका छन् । २५ देखि ३५ वर्ष उमेर समूहका उनीहरूलाई मञ्चलगायतको व्यवस्थापनमा जेपीआरका शीतल सिह र साउन्ड सिस्टममा साइलेन्स इन्टरटेन्मेन्टका विक्रान्त श्रेष्ठले सघाएका थिए ।