माओवादीलाई गृह र पराराष्ट्र सहित ११ मन्त्रालय/एमालेले ८

लिम्वूवान डट व्लगस्पोट डटकम,काठमाडौं

फाल्गुन ४ - माओवादी अध्यक्ष पुष्पकमल दाहाल र प्रधानमन्त्री झलनाथ खनालबीच मन्त्रालय बाँडफाँडमा सैद्धान्तिक सहमति भएको छ । बुधबार बिहान प्रधानमन्त्री निवास बालुवाटारमा भएको छलफलमा माओवादीलाई गृह र पराराष्ट्र सहित ११ वटा मन्त्रालय दिइने स्रोतले जनाएको छ । बुधबार बिहान भएको भागबण्डामा एमालेले ८ वटा मन्त्रालय पाएको छ । एमालेको भागमा संचार, रक्षा, सामान्य प्रशासन र स्थानीय विकास मन्त्रालय परेको बालुवाटार निकट स्रोतले जनाएको छ । एमालेले यसअघि नै अर्थ मन्त्रालयको जिम्मेवारी पाईसकेको छ ।
दुवै पार्टीले भौतिक योजना मन्त्रालयमा दावी गरेपछि त्यसमा सहमति हुन सकेन । मधेसी जनधिकार फोरमले पनि सरकारमा सहभागी हुन चासो देखाएपछि आपूर्ती, सिचाईं र उर्जा मध्ये एउटा मन्त्रालय उसको भागमा राखिने भएको छ । फोरमसँग सहमति नभए ती मन्त्रालय माओवादीले पाउने छ । माओवादीले आजको छलफलबाट आफ्नो मन्त्रीमण्डलको नामावली प्रधानमन्त्रीलाई बुझाएको छ । तर, मन्त्रालयमा ठोस सहमति बन्न बाँकी रहेकाले माओवादी अध्यक्ष दाहाल पोखराबाट फर्केपछि अपरान्ह्र ३ बजे पुन छलफल हुने बालुवाटारले जनाएको छ ।