तीन दिनदेखि ललितकला क्याम्पसमा ताला

लिम्वूवान डट व्लगस्पोट डटकम,काठमाडौं

सात महिनाअघि क्याम्पसमा नियुक्त भएका क्याम्पस प्रमुख डा. लय मैनालीले विद्यार्थीको मागको सुनुवाइ नगरेको आरोप लगाउँदै भोटाहिटीस्थित ललितकला क्याम्पसका विद्यार्थीहरुले तीन दिनदेखि क्याम्पसमा तालाबन्दी गरेका छन्। पाँच महिनाअघि विद्यार्थीहरुले क्याम्पस प्रशासन तथा लेखा शाखामा तालाबन्दी गरी क्याम्पस प्रमुखको राजीनामा मागसहित सांकेतिक विरोधस्वरुप क्याम्पस प्रमुखको बस्ने कुर्सी झ्यालमा झुन्ड्याएका छन्।क्याम्पस प्रमुख मैनालीले क्याम्पस नआई घरबाटै एकलौटीरुपमा क्याम्पस प्रशासन चलाएको तथा क्याम्पसका दक्ष शिक्षकलाई हटाइ आफ्ना नजिकका शिक्षकलाई नियुक्त गरेको आरोप विद्यार्थीहरुले लगाएका छन्। क्याम्पसका विद्यार्थी संगठन अनेरास्ववियु अखिल क्रान्तिकारी नेविसंघ तथा एमएफएका विद्यार्थीहरुले बिहीबार क्याम्पसको मूलगेटमा पत्रकार सम्मेलन गरी क्याम्पस प्रमुखको राजीनामा माग गरेका छन्।विद्यार्थीको हकहितका लागि गरिएको संघर्षलाई क्याम्पस प्रमुखले वेवास्ता गरी लामो समयसम्म क्याम्पसलाई अस्तव्यस्त बनाइ आफ्नो जिम्मेवारी पूरा नगरी त्रिभुवन विश्वविद्यालको नियमविरुद्ध घरबाटै क्याम्पस चलाएको पत्रकार सम्मेलनमा स्ववियु सभापति लालकाजी लामाले जानकारी गराउनुभयो। उहाँले क्याम्पस प्रमुखले नै एमएफएका विद्यार्थीहरुसँग आवश्यकभन्दा बढी शुल्क लिएको विद्यार्थीसंगठनहरुसँग भएका सहमति सम्झौताअनुसार गत वर्षदेखि शुरु भएको एमएफएबाट उठेको रकमको पारदर्शी नगरी अनियमितता गरेको आरोप लगाउनुभयो।उता त्रिवि ललितकला भवनमा साचालन गरिएको एमएफएको अध्ययन प्राध्यापकहरुले क्याम्पस प्रमुखले ५/६ महिनादेखि आफूहरुलाई तलब नखुवाएको भन्दै पढाइ ठप्प पारेका छन्। विद्यार्थीहरुले भदौमा गरिएको तालाबन्दी खुलाउन पहल नगरिएकाले माघ २७ गते त्रिवि ललितकला भवनमा पूर्णरुपमा तालाबन्दी गरेका छन्।क्याम्पस प्रमुख मैनालीले नेपाल समाचारपत्रसँग भन्नुभयो- विद्यार्थीहरुले विवादलाई टुंगो लगाउन आग्रह गर्दा पनि वार्ताको लागि टेरपुच्छर लगाएका छैनन्। सर्वप्रथम क्याम्पसमा गरिएका तालाबन्दीलाई विद्यार्थीले खोले समस्या समाधान हुन्छ। क्याम्पसमा तालाबन्दी हुँदा करिब ८ सय विद्यार्थीको पढाइ अन्योलमा परेको छ।