माओवादीका अध्यक्ष पुष्पकमल दाहाल 'प्रचण्ड' कञ्चनपुरमा

लिम्वूवान डट व्लगस्पोट डटकम,काठमाडौं

एकीकृत नेकपा माओवादीका अध्यक्ष पुष्पकमल दाहाल 'प्रचण्ड' कञ्चनपुर आइपुग्नुभएको छ । एकीकृत नेकपा माओवादीले राष्ट्रिय स्वाधीनता रक्षाका लागि घोषणा गरेको चौथो चरणको आन्दोलन अन्तर्गत भारतीय पक्षबाट अतिक्रमित सीमा क्षेत्रको अवलोकनका लागि माओवादी अध्यक्ष प्रचण्ड आइतबार कञ्चनपुर आइपुग्नुभएको हो । अध्यक्ष प्रचण्डले भारतीय पक्षबाट अतिक्रमण गरिएको कञ्चनपुरको ब्रहृमदेवलगायतका अन्य क्षेत्रको निरीक्षण गर्नुहुने कार्यक्रम रहेको एकीकृत नेकपा माओवादीका कञ्चनपुर इन्चार्ज देवीदत्त पाण्डेले जानकारी दिनुभएको छ । उहाँका अनुसार माओवादी अध्यक्ष प्रचण्डले सोमबार बिहान अतिक्रमित सीमा क्षेत्रको निरीक्षण गर्ने र दिउँसो महेन्द्रनगरको खुलामञ्चमा आयोजना हुने आमसभालाई सम्बोधन गर्नुहुने कार्यक्रम रहेको छ । यसैबीच, माओवादी अध्यक्ष प्रचण्डको आगमनलाई मध्यनजर गर्दै स्थानीय प्रशासनले जिल्लाको सुरक्षा व्यवस्था निकै कडा पारेको छ । प्रशासनले राजमार्गलगायतका स्थानहरूमा सुरक्षाकर्मीहरू परिचालन गरेको जनाएको छ । एकीकृत नेकपा माओवादीको केहीदिनअघि बसेको केन्द्रीय समितिको बैठकले राष्ट्रिय स्वाधीनताको मुद्दा गम्भीर सङ्कटमा परेको निष्कर्ष निकाल्दै विरोधका कार्यक्रम सार्वजनिक गरेको थियो ।