सीमा अवलोकन नसकी टोली राजधानी फर्किए

लिम्वूवान डट व्लगस्पोट डटकम,काठमाडौं

अतिक्रमित सीमा अवलोकन गर्न तीन दिनको समय लिई आएको टोली कार्य सम्पन्न नै नगरी २४ घन्टाभित्रै राजधानी फर्किएको छ । टोलीले दुई सय ६४ स्थानमध्ये एक गाविसको दुई स्थानको सीमास्तम्भ मात्र निरीक्षण गर्‍यो । अति जरुरी काम पर्‍यो भन्दै टोलीले दक्षिण झटिकैयाको सीमा क्षेत्रका दुई स्थानको मात्रै अध्ययन टिपोट गरी सोमबार दिउँसो बुद्ध एयरको उडानबाट राजधानी फर्केको हो । अन्तर्राष्ट्रिय सम्बन्ध तथा मानवअधिकार समितिको टोली आइतबार दिउँसो ४:३० बजे बारामा ओर्लिएको थियो । तीन दिनको कार्यक्रम रहेको भए पनि अति जरुरी कामले गर्दा सोमबार नै फिर्ता भएको बाराका प्रमुख जिल्ला अधिकारी तारानाथ गौतमले बताए । उनले भने, 'उहाँहरूले त्यस्तै परे फेरि जिल्ला आउने जानकारी दिनुभएको छ ।' दुई स्थानबाटै फर्केको टोलीले बनाएको प्रतिवेदन अपुरो हुने भन्दै स्थानीय पीडित बासिन्दाले अन्य अतिक्रमित क्षेत्रको समेत भ्रमण गर्नुपर्ने माग गरेका छन् । जिल्ला टेक्नेबित्तिकै टोलीका संयोजक नवीन्द्रराज जोशीले अतिक्रमित सीमाक्षेत्र पूरै अध्ययन अवलोकन गरी संसदीय समितिमा प्रतिवेदन पेस गर्ने आश्वासन दिएका थिए । जोशीको संयोजकत्वमा रहेको टोलीमा सभासद् सावित्री काफ्ले र परराष्ट्रका उपसचिव पुष्कर गौतमसहित नापी विभागका अधिकृत शशीनरसिंह रायमाझी सहभागी थिए । बाराको नौ गाविसका ६८५ वटा सीमास्तम्भमध्ये दुई सय ६४ वटा सीमास्तम्भ बेपत्ता भएको सीमा सुरक्षा बलका प्रमुख, सशस्त्र प्रहरी उपरीक्षक शिवबहादुर मल्लले आइतबार टोलीलाई जानकारी गराएका थिए । सीमा सुरक्षा बलले सीमास्तम्भ बेपत्ता भएको र हजारौँ बिघा जग्गा अतिक्रमण भएको जानकारी गराउँदा गराउँदै पनि उक्त टोलीले एक गाविसको दुई स्थानको मात्र स्तम्भ निरीक्षण गरेको हो । पीडित नौ गाविसका बासिन्दाले आफ्ना पिर-मर्का सुनाउन सोमबार दिनभर कुरे पनि टोली फर्केको खबर पाएपछि निराश बनेका थिए । टोलीले गरेको अध्ययन अवलोकन अपुरो रहेको र यो अध्ययनलाई आधिकारिक रूपमा पुष्टि भएको मान्न नसकिने नागरिक समाजका वसन्त खतिवडाले बताए । सीमामा पुग्नेबित्तिकै टोलीका संयोजकले पत्रकारमाझ सीमास्तम्भ छुँदै फोटो खिचाएका थिए ।