कमल नेपालीलाई मात्र 'वर्षका बालक-२०६५' को उपाधि प्रदान

लिम्वूवान डट व्लगस्पोट डटकम,काठमाडौं

वीर गणेशमान सिंह बालप्रतिभा पुरस्कार कोषले विभिन्न पाँचवटा विधामध्ये साहसिक कार्य गर्ने बालक कमल नेपालीलाई मात्र 'वर्षका बालक-२०६५' को उपाधि प्रदान गर्ने भएको छ । साहित्यिक सिर्जना, खेलकुद, विज्ञान, साहसिक कार्य र विविध विषयमा विलक्षण प्रतिभा प्रदर्शन गर्ने १६ वर्षमुनिका प्रतिभावान् बालबालिकालाई वर्षका बालकको घोषणासहित पुरस्कार तथा सम्मान गर्ने चलनअनुसार उक्त घोषणा गरिएको हो ।कोषले अन्य प्रतिभावान् बालबालिकाको जानकारी प्राप्त गर्न नसकेका कारण साहसिक कार्य गर्ने १२ वर्षे बालक कमल नेपालीलाई उक्त उपाधि प्रदान गर्न भएको हो । सिंहको जन्मजयन्ती भाइटीकाको भोलिपल्ट त्यस्ता प्रतिभावान् बालबालिका नाम घोषणा गर्ने र जनआन्दोलन दिवसमा उपाधि प्रदान गर्ने गरिएता पनि यस वर्ष कोषको उद्देश्यअनुसार सबै विधाका प्रतिभावान बालबालिकाको जानकारी प्राप्त हुन नसकेको तर १२ वर्षका नेपालीलाई भने कोषले गत असार १३ गते नै साहसिक बालकका रूपमा घोषणा गरिसकेको कोषका महासचिव प्रचण्डराज प्रधानले बताउनुभयो ।नेपालीले पोखरास्थित सेती नदीको खोँचमा खसेकी अढाइ वर्षकी आराधनालाई २१ घण्टापछि सकुशल उद्धार गरेका थिए । कोषले बालबालिकाको जीवन जोखिममा पर्नेगरी उनीहरूलाई कुनै जोखिमपूर्ण काममा नलगाउन आग्रह पनि गरेको छ ।