सीमान्तकृत समुदायको राष्ट्रिय घोषणा पत्र जारी

लिम्वूवान डट व्लगस्पोट डटकम,काठमाडौं

नयाँ संविधानमा आफ्ना अधिकार सुनिश्चित गर्नुपर्ने माग गर्दै काठमाडौंमा भेला भएका देशभरिका सीमान्तकृत समुदायका प्रतिनिधिहरूले राष्ट्रिय घोषणा पत्र जारी गरेका छन । उनीहरूले घोषणापत्र राष्ट्रपति, संविधानसभा अध्यक्ष र संविधानसभाका सबै समिति र सभासद्हरूलाई हस्तान्तरण गर्ने जनाएका छन । संविधानसभा सहयोग सञ्जालको सहयोगमा काठमाडौंमा भएको तीनदिने भेलापछि राष्ट्रिय घोषणापत्र निर्माण गरिएको हो । यसअघि, ७५ वटै जिल्लामा तयार पारिएका 'संविधान निर्माण प्रक्रियामा सीमान्तकृत समुदायका आवाज' नामक जिल्ला घोषणापत्रहरूको आधारमा राष्ट्रिय घोषणापत्र तयार पारिएको हो । पहिलो चरणमा संविधानसभाको अल्पसंख्यक तथा सीमान्तकृत समुदायको हकअधिकार संरक्षण समितिका सभापति लालबाबु पण्डित र नेपाल बार एसोसिएसनका अध्यक्ष विश्वकान्त मैनालीलाइ सञ्जालले घोषणापत्र बुझाएको छ । संविधानसभा सहयोग सञ्जालले यसअघि नै देशका विभिन्न एक हजार पाँच सय स्थानमा सीमान्तकृत वर्ग/समुदायसित छलफल गरी नयाँ संविधानमा सीमान्तकृत समुदायका अधिकार र सरोकारका सवालहरू समावेश गर्ने सम्बन्धमा जिल्लास्तरीय घोषणापत्र तयार गरेको थियो ।