थारुहट बन्दको विरोधमा बृहत् प्रदर्शन

लिम्वूवान डट व्लगस्पोट डटकम,काठमाडौं

थारुहट संयुक्त संघर्ष समितिले गरेको बन्दको विरोधमा शुक्रबार बिहानैदेखि धनगढीमा बृहत् प्रदर्शन भइरहेको छ। बन्दले जनजीवन कष्टकर बनेपछि स्वस्फूर्तरुपमा निस्केको प्रदर्शनमा विद्यार्थी व्यापारीलगायत् सयौंको सहभागिता छ। शान्ति सुरक्षा कायम गर, शिक्षण संस्था खुला गर, तोडफोड गर्न पाइँदैन, बजार खुलाउनै पर्छ जस्ता नारा उनीहरुले लगाएका छन्। शुक्रबार बिहान ८ बजे सुरु भएको रयालीले नगर परिक्रमा गरेको छ। उनीहरुले एलएन चोकमा कोणसभा पनि गरेका थिए। कोणसभामा व्यापारी चन्द्रप्रकाश भट्ट विद्यार्थी सुभास चन्द र नागरिक समाजका प्रेम बिसीले बन्दको निहुँमा तोडफोड गर्न र विद्याथीको भविष्यमाथि खेलवाड गर्न नपाइने बताएका थिए।प्रदर्शनका क्रममा युवाहरुले बन्द पसल खुलाउन पनि लगाएका थिए। बिहीबार साँझ धनगढीको शिवनगरमा खुला रहेका पसल थारु कार्यकर्ताले जबर्जस्ती बन्द गराउँदा व्यापारी र थारु कार्यकर्ताबीच झडप भएको थियो। कुनै पनि बेला झडप हुनसक्नेतर्फ सतर्क हुँदै बाक्लो सुरक्षाकर्मी तैनाथ गरिएको छ।