भारतमा तेस्रो चरणको चुनाव कडा सुरक्षाबीच सम्पन्न

लिम्वूवान डट व्लगस्पोट डटकम,काठमाडौं

नयाँदिल्ली/ भारतमा तेस्रो चरणको चुनावको मतदान बिहीबार कडा सुरक्षाबीच सम्पन्न भएको छ । नौ राज्य र दुईवटा केन्द्र शासित प्रदेशमा जारी मतदान छिटपुट घटनाबाहेक शान्तिपूर्ण रूपमा भएको सरकारी अधिकारीहरूले बताएका छन् । मध्यप्रदेश र गुजरातमा प्रचण्ड गर्मीबाट बच्न बिहान सबेरैदेखि मतदाता लामबद्ध भएका थिए । जम्मुकास्मिर र मुम्बईमा भने अन्य क्षेत्रको तुलनामा सुस्तगतिमा मतदान भएको थियो । तेस्रो चरणको चुनावमा एक सय एक महिलासहित एक हजार पाँच सय ६७ जना चुनावी मैदानमा उत्रेका छन् । तेस्रो चरणको चुनावमा निर्वाचन आयोगले एक लाख ६५ हजार एक सय १२ मतदानकेन्द्र स्थापना गरेको छ । यस चुनावमा १४ करोड ५० लाख मतदाता छन् । चुनावमा भारतका हस्ती मानिने कंग्रेस नेत्री सोनिया गान्धी, भारतीय जनता पार्टीका वरिष्ठ नेता लालकृण आडवानी र भूतपूर्व प्रधानमन्त्री हर्दनहल्लीडोडेगौडा देवेगौडालगायत नाम चलेका अन्य नेताको भाग्यको फैसला गर्नेछ ।