अब विवाहित महिलाले पनि सेनामा प्रवेश पाउँने

लिम्वूवान डट व्लगस्पोट डटकम,काठमाडौं

नेपाली सेनामा सेवामा प्रवेश गर्न चाहने महिला अविवाहित नै हुनुपर्ने विद्यमान कानुनी व्यवस्था हट्ने भएको छ। सर्वोच्च अदालतले नयाँ बन्न लागेको सैनिक प्रहरी नियमावलीमा त्यस्तो भेदभावपूर्ण प्रावधान नराख्न सरकारको नाममा आदेश दिएकाले उक्त व्यवस्था हट्ने भएको हो। सर्वोच्चको आदेशबमोजिम नयाँ नियमावली आएपछि विवाहित महिलाले सैनिक सेवामा प्रवेश गर्ने बाटो खुला हुनेछ। हालको नियमावलीले सैनिक प्रहरी सेवामा प्रवेश गर्न अविवाहित र एकल महिला हुनुपर्ने एवं आधारभूत तालिम अवधिभर विवाह गर्न नपाउने व्यवस्था गरेको छ।उक्त व्यवस्था बदर गर्न दायर भएको रिटमा बिहीबार निर्णय सुनाउँदै न्यायाधीशहरु रामप्रसाद श्रेष्ठ रामकुमारप्रसाद साह र अवधेश यादवको विशेष इजलासले नयाँ नियमावलीमा भेदभावपूर्ण व्यवस्था नराख्न सरकारलगायतका नाममा आदेश दिएको हो।महिला कानुन विकास माचका तर्फबाट अधिवक्ताद्वय सपना प्रधान मल्ल र मिरा ढुंगानाले संयुक्त रुपमा उक्त कानुनी व्यवस्थाले समानताको संवैधानिक हक विवाहमा समान अधिकार लैङ्गिक विभेदविरुद्धको अधिकारसमेतको हनन भएको जनाउँदै सर्वोच्चमा २०६४ साउन १० मा रिट दिएका थिए। रक्षा मन्त्रालयले सैनिक ऐन २०६३ बमोजिम नयाँ नियमावली बनाइरहेको छ।