मन्त्रीले शुभकामना कार्डसँगै पत्रकारलाई पैसा पनि बाँडे

लिम्वूवान डट व्लगस्पोट डटकम,काठमाडौं

हिन्दुहरुको महान पर्व दशैंको अवसरमा दिएको शुभकामना कार्डमा सबैले शुभकामना सन्देश नै दिएका हुन्छन् । तर एक मन्त्रीले भने नगद समेत दिएका छन् । दशैंको अवसरमा कसैले सामाजिक सञ्जाल फेसबुक, ट्विटरबाट शुभकामना आदान प्रदान गरिरहेका हुन्छन् । कसैले फोनबाट कसैले एसएमएसबाट त कसैले शुभकामना कार्ड नै दिएर । त्यस्तै स्वास्थ्य तथा जनसंख्या मन्त्री राजेन्द्र महतोले पनि पत्रकारहरुलाई दशैंको शुभकामना कार्ड दिए । तर त्यो कार्डमा शुभकामना मात्रै नभएर रुपैयाँ पैसा समेत रहेको थियो । स्वास्थ्य तथा जनसंख्या मन्त्री राजेन्द्र महतोले आफूनिकट, स्वास्थ्य बीट हेर्नेसहितका पत्रकारलाई 'जरुरी काम छ, मन्त्रीज्यूलाई भेट्नु पर्‍यो' भन्दै सहयोगीलाई पटकपटक टेलिफोन गर्न लगाइ पुल्चोकस्थित सरकारी निवासमा बोलाएर शुभकामना कार्डसहित ३ हजारदेखि ८ हजार रुपैयाँसम्म नगद बाँडेका हुन् । स्वास्थ्य मन्त्री महतोको यो कार्य पदीय मर्यादा विपरित मात्र नभएर नेपालको अन्तरिम संविधान र कानुनको प्रत्यक्ष उल्लंघन पनि भएको भन्दै नेपाल पत्रकार महासंघले पैसा बाँडको प्रति आपत्ति जनाएको छ । यसैबीच पत्रकार महासंघले दसैं विदाको अवधिमा सञ्चारमाध्यम र पत्रकारमाथि हुनसक्ने आक्रमण, प्रेस तथा अभिव्यक्ति स्वतन्त्रताविरोधी गतिविधि र काम-कारवाहीको सम्भावनालाई ध्यानमा राखेर हमला वा हस्तक्षेप भएमा केन्द्रीय सचिवालय संयोजक सतीशजंग शाही (९८५१०७५३५५) र कार्यालय सहायक ख्यामप्रसाद चापागाईं (९८४१५९४८२४) लाई विवरण उपलब्ध गराउन महासंघले अनुरोध गरेको छ ।