सहिदगेटबाट त्रिभुवनको सालिक हटाइने

लिम्वूवान डट व्लगस्पोट डटकम,काठमाडौं

पुस १८ - मन्त्रिपरिषद्को आजको बैठकले काठमाडौँको सहिदगेटमा रहेको स्वर्गीय राजा त्रिभुवनको सालिकलाई नारायणहिटी सङ्ग्रहालयमा स्थानान्तरण गर्ने निर्णय गरेको छ। प्रधान मन्त्री तथा मन्त्रिपरिषद्को कार्यालयमा बसेको बैठकले सो निर्णय गरेको नेपाल सरकारका प्रवक्ता तथा उपप्रधानमन्त्री एवम् परराष्ट्रमन्त्री नारायणकाजी श्रेष्ठले पत्रकारहरूलाई जानकारी दिए। लोकतान्त्रिक आन्दोलनको सफलतापछि सहिदगेटमा रहेका चार अमर सहिदको सालिकभन्दा माथि राखिएको स्वर्गीय राजा त्रिभुवनको सालिकलाई त्यहाँबाट हटाउन आवाज उठेको थियो। त्रिभुवनको सालिक हटाइने भएपनि सहिदहरूको सालिक यथावत् रहनेछ। हरेक नयाँ प्रधानमन्त्रीले सपथ ग्रहणपछि सहिदपार्कमा पुगी सलामी गर्ने प्रचलन रहेकामा सहिदपार्कमा त्रिभुवनको पनि सालिक भएका कारण वर्तमान प्रधानमन्त्री डा. बाबुराम भट्टराईले सपथ लिएपछि कीर्तिपुरस्थित पुष्पलालको सालिकमा माल्यार्पण गर्न पुगेका थिए। बैठकले पर्यटन वर्षका कतिपय कार्यक्रमलाई निरन्तरता दिने क्रममा हवाईमार्गबाट एकसयजना विदेशी ल्याई नेपालमा कुनै सभा, सम्मेलन गराउने आयोजकलाई पाँच लाख रुपैयाँ प्रदान गर्ने निर्णय गरेको छ। यसैगरी, बैठकले नेपाल खानेपानी संस्थानका महाप्रबन्धक धर्मकुमार बजिमयलाई अवकाश दिई रामकुमार यादवलाई कायम मुकायम महाप्रबन्धकमा नियुक्त गरेको छ। बैठकले आगामी २०६८ चैत्र २३ देखि २४ गतेसम्म पर्वतीय मुलुकहरुको सहभागितामा नेपालमा हुने जलवायु परिवर्तनसम्बन्धी अन्तर्राष्ट्रिय सम्मेलनका लागि वातावरणमन्त्रीको संयोजकत्वमा १३ सदस्यीय आयोजक समिति पनि गठन गरेको छ।