लोकप्रिय साइट फेसबुक चलाउनेको संख्या ३५ करोड

लिम्वूवान डट व्लगस्पोट डटकम,काठमाडौं

मंसिर १७ ,सामाजिक सञ्जालको लोकप्रिय साइट फेसबुक प्रयोग गर्नेको संख्या ३५ करोड पुगेको छ। साइटका संस्थापक मार्क जुकेरवर्गले बुधबार सबै प्रयोगकर्तालाई खुला पत्र लेख्‍दै यस्तो दावी गरेका हुन्। प्रयोगकर्ताका सम्बन्धमा गरिएको यो दावी सही हो भने फेसबुक विश्व कै सबैभन्दा बढी प्रयोगकर्ता भएको सामाजिक सञ्जालको साइट बन्नेछ। खुला पत्रमा प्रयोगकर्तामा भएको वृद्धिसँगै गोपनीयताको चुनौति थपिएको उल्लेख छ। फेसबुकमा प्रयोगकर्ताहरुले राख्‍ने जानकारी, सूचना, फोटो र भिडियो जोसुकैले हेर्न सक्ने भएकोले व्यक्तिको गोपनीयता भंग हुँदै गएको छ। फेसबुकको स्टाटस हेरेरै घरमा एक्लो भएको थाहा पाएर भारतको एक सहरमा एक युवती बलात्कृत भइन्। फेसबुकको रिलेसनसिप स्टाटसमा विवाहित लोग्नेले अविवाहित लेखेका कारण हत्या गरिएको समाचार पनि आयो। यस्तै समस्यालाई ध्यानमा राख्दै फेसबुकले अब गोपनीयतासम्बन्धी नयाँ नीति ल्याउने जुकेरवर्गको खुलापत्रमा उल्लेख छ। केही साताभित्र फेसबुकले प्रयोगकर्तालाई नयाँ प्राइभेसी सेटिङ समीक्षा गर्न र अपडेट गर्न लगाउँदैछ। आफ्ना कुन कुन सामाग्री क-कसलाई बाँड्ने वा हेर्न मिल्ने अनुमति दिने भन्ने छनौट तपाईँ आफै गर्नु हुन म अनुरोध गर्छु, जुकेरवर्गले आफ्नो पत्रमा भनेका छन्। यी सेटिङसँगै फेसबुकले क्षेत्रीय नेटवर्क पनि हटाउने भएको छ। यी नेटवर्कहरुमा धेरै सदस्य भएका कारण गोपनीयतामा असर पर्न सक्ने भन्दै हटाउने निर्णय गरिएको पत्रमा उल्लेख छ। सुरुमा फेसबुक विश्वविद्यालयका विद्यार्थीहरुको सञ्जालका लागि बनाइएको थियो। सर्वसाधारणलाई सार्वजनिक गर्ने बित्तिकै यसको लोकप्रियता चुलिएको हो। नेपालमा तत्कालीन अर्थमन्त्री बाबुराम भट्टराईलगायतका सेलिब्रिटीहरुले फेसबुकको प्रयोग गर्ने गरेको खबर गत वर्ष मिडियामा लगातार आएपछि यसको लोकप्रियता बढेको हो। पाँच वर्षअघि सुरु भएको फेसबुकका प्रयोगकर्ता अगस्त २००८ मा १० करोड मात्रै थियो। गत अप्रिलमा यसको संख्या २० करोड पुग्यो र गत १५ सेप्टेम्बरमा ३० करोड। यसको साढे दुई महिनामा नै ५ करोड प्रयोगकर्ता थपिएका छन्।