पेट्रोलियम पदार्थको बिक्री वितरण सुचारु हुने

लिम्वूवान डट व्लगस्पोट डटकम,काठमाडौं

मङ्सिर १७ गते । पेट्रोल पम्पमा कार्यरत मजदुरहरू र पेट्रोलियम डिलर्स एसोसिएसन प्रतिनिधिका बीच बुधबार सातबुँदे सहमति भएपछि बिहीबारदेखि पेट्रोलियम पदार्थको बिक्री वितरण सुचारु हुने भएको छ । विभिन्न २० बुँदे माग राखेर गत शुक्रबारदेखि आन्दोलनमा उत्रिएको अखिल नेपाल पेट्रोलियम मजदुर सङ्घका प्रतिनिधि र डिलर्स एसोसिएसनका प्रतिनिधिबीच बुधबार राति सहमति भएपछि मजदुर सङ्घले यसअघिको घोषित अनिश्चितकालीन नेपाल आयल निगमका डिपो बन्द कार्यक्रम फिर्ता लिएको हो । देशभरका सात सय पेट्रोल पम्पमा १३ हजार मजदुर कार्यरत रहेका छन् ।वार्ताबाट मजदुर सङ्घले उठाएको नियुक्तिपत्रको सम्बन्धमा पम्पमा कार्यरत मजदुरलाई गत साउन १ गतेदेखि लागू हुनेगरी पेट्रोल पम्पले नियुक्तिपत्र दिने र त्यो मितिबाट मजदुरको तलबबाट सरकारले यसै आर्थिक वर्षबाट तलबमा उठाउने गरेको एक प्रतिशत सामाजिक सुरक्षा कोषको लागि रकम असुल गर्ने कुरामा सहमति भएको छ । बुधबार दिउँसो २ बजेबाट सुरु भएको वार्ता करिब पाँच घण्टासम्म त मजदुरलाई स्थायी प्रकृतिको नियुक्ति दिनुपर्ने मागमा मजदुरहरू अडिग रहेपछि वार्ता लम्बिएको हो ।