माओवादी आचारसंहिता अलपत्र

लिम्वूवान डट व्लगस्पोट डटकम,काठमाडौं

भदौ ९- एक महिना बितिसक्दा पनि एकीकृत माओवादीले आचारसंहिता कार्यान्वयनको कुनै सुरसार गरेको छैन। गत महिना पहिलो साता सम्पन्न माओवादी बैठकले केन्द्रीय नेताका लागि १५ बूँदे आचारसंहिता जारी गरेको थियो। त्यसको अनुगमन केन्द्रीय पदाधिकारीबाटै गर्ने उल्लेख छ।कार्यकर्ताले यसअघि पनि नेतृत्वले यस्ता वाचा गरेको तर पालना नगरेको भन्दै कार्यकर्ताका आँखामा छारो हाल्न मात्र खोजिएको प्रतिक्रिया दिएका छन् । आचारसंहिताको अन्तिम बूँदामा केन्द्रीय सदस्यले महिनामा एक दिन र केन्द्रीय पदाधिकारीले दुई महिनामा एक दिन शारीरिक श्रम गर्नुपर्ने छ ।'के गर्ने, कसरी कार्यान्वयन गर्ने भन्ने टुंगो लागेको छैन,' सचिव पोष्टबहादुर बोगटीले नागरिकसित भने, 'सम्बन्धित ठाउँकै कमिटीले त्यसको तय गर्ने हो ।'आचारसंहितामा शारीरिक श्रम भने पनि कस्ता काम भन्ने स्पष्ट पारिएको छैन। पार्टीको आन्तरिक कार्यक्रम र प्रशिक्षणका कारण अलमल भएको बोगटीले जिकिर गरे। एकै महिनामा लागू हुन त गार्‍हो भए पनि कार्यान्वयन हुने उनले बताए।'जान्या काम गर्ने हो,' बोगटीले भने, 'त्यो कोदालो खन्ने, गारो लाउने, कार्पेन्टर, ढुंगा माटो बोक्ने जे पनि हुन सक्छ।' यसलाई कार्यान्वयन गर्न सजिलो नभएको सचिव बोगटीले स्वीकारे। 'फुर्सद र वातावरण दुवै मिलाउनु पर्‍यो । गार्‍हो त गार्‍है छ,' उनले भने।आचारसंहिताअनुसार अध्यक्ष पुष्पकमल दाहाल, वरिष्ठ उपाध्यक्ष्यत्रय मोहन बैद्य, बाबुराम भट्टराई र नारायणकाजी श्रेष्ठ, महासचिव रामबहादुर थापा र सचिवद्वय चन्द्रप्रकाश गजुरेल र पोष्टबहादुर बोगटीले दुई महिनामा एक दिन शारीरिक श्रममा गर्नुपर्नेछ। माओवादी केन्द्रीय समितिका बाँकी १ सय ३० जनाले महिनामा एक दिन शारीरिक श्रममा भाग लिनुपर्नेछ। त्यो जनसेवा र सामूहिक श्रम हुने बोगटीले बताए।मोटाउँदै गएका नेताले गर्ने कस्तो खालको शारीरिक श्रम गर्लान् ? नेताहरु आफै विश्वस्त छैनन्। एक कार्यकर्ताले भने, 'पहिलो कुरा त लागू नै हुन्न, भयो भने पनि काम गरेको देखाउने मात्र हो। सामन्तको भन्दा ठूला भूँडीवाल नेताले कस्तो शारीरिक श्रम गर्लान् ?'