झाडापखालाबाट हुम्लामा ८ को मृत्यु

लिम्वूवान डट व्लगस्पोट डटकम,काठमाडौं

सुर्खेत, भदौ १२ - भदौ पहिलो सातादेखि हुम्लाको कालिका गाविसमा फैलिएको झाडापखालाबाट ८ जनाको मृत्यु भएको छ । सदरमुकाम सिमकोटबाट ४० किमि टाढाको कालिकाको पाल्स गाउँमा ४ र करकाई गाउँमा ४ जनाको मृत्यु भएको हो । अन्य ४५ जना बिरामी छन् । हुम्लाका सभासद कर्णजित बुढाथोकीले बिहीबार पत्रकार सम्मेलन गरी प्रकोप नियन्त्रणमा सरकारले चासो नदेखाएको आरोप लगाए । 'गाउँमा स्वास्थ्यकर्मी र औषधि अभाव छ,' प्रभावित क्षेत्रमा बुधबार हेलिकप्टरबाट औषधि पुर्‍याएर फर्केका उनले भने । क्षेत्रीय स्वास्थ्य निर्देशनालयका महामारी नियन्त्रण विषेशज्ञ सुजिककुमार साहले त्यहाँ 'फुड प्वाइजन' बाट झाडापखाला फैलिएको बताए । अछाममा थप दुई अछाममा पनि बिहीबार थप २ को मृत्यु भएको छ । रहफ ८ का देवबहादुर विक र बाब्ला गाविसकी लक्ष्मीदेवी रावतको मृत्यु भएको हो । जिल्लामा झाडापखाला प्रकोपबाट मृत्यु हुनेको संख्या २८ पुगेको छ । जिल्ला स्वास्थ्य कार्यालयका प्रमुख डा. पुरुषोत्तमराज सेढाइँका अनुसार सदरमुकाम मंगलसेनलगायतका २ दर्जन गाविसमा झाडापखाला फैलिएको छ । तुर्माखाद र नाडा गाविसमा प्रकोप बढी देखिएको छ ।