अपहरण गरिएकी एक किशोरी १८ वर्षपछि फेला

लिम्वूवान डट व्लगस्पोट डटकम,काठमाडौं
जेसी सन् १९९१ मा अपहरित भएकी थिइन् । त्यतिबेला उनी मात्र एघार वर्षकी थिइन् । अठार वर्षपछि उनी भेटिएकी छिन्, दुई छोरीकी आमाका रूपमा ।एघार वर्षमा अपहरण गरिएकी एक किशोरी १८ वर्षपछि फेलापरेकी छिन् । आफ्नै अपहरणकर्ताबाट दुई सन्तान पनि जन्माएकी छिन् उनले । उनी हुन् जेसी ली डुगार्ड । उनी र उनका ११ र १५ वर्षीया छोरीलाई अपहरणकर्ताले आफ्नो घरपछाडि लुकाएको थियो ।आरोपी अपहरणकर्ता ५८ वर्षीय फिलिप गारिडो र उसकी पत्नी न्यान्सीलाई क्यालिफोर्नियामा हिरासतमा लिइएको छ । जेसी डुगार्डको डिएनए परीक्षण गरिँदै छ । हाल उनको आफ्नी आमासँग पुनर्मिलन भएको छ ।'उनको स्वास्थ्य राम्रै छ,' एल डोराडो काउन्टी पुलिसका सहायक अधिकृत फ्रेड कोलर भन्छन्, 'तर, घरपछाडि यौटा कोठामा अठार वर्षसम्म गुम्सिएर बस्नु अवश्य आघातपूर्ण र पीडादायी हुन्छ ।' जेसी सन् १९९१ मा अपहरित भएकी थिइन् । त्यतिबेला उनी मात्र एघार वर्षकी थिइन् । उनलाई गारिडो दम्पतीले अपहरण गरेको थियो र कारमा राखेर लगेको थियो ।