राष्ट्रपति समक्ष प्रधानसेनापतिमा नियुक्ति गर्न सिफारिस पठाउने निर्णय

लिम्वूवान डट व्लगस्पोट डटकम,काठमाडौं

भदौ १० सरकारले छत्रमान सिह गुरुङलाई प्रधानसेनापतिमा नियुक्ति गर्न राष्ट्रपति रामवरण यादवसमक्ष सिफारिस पठाउने निर्णय गरेको छ। मन्त्रिपरिषदको बुधबारको बैठकले गुरुङलाई भदौ २४ गते देखि प्रधानसेनापतिमा नियुक्त गर्न राष्ट्रपतिलाई सिफारिस गरेको हो।प्रधान सेनापति रुक्माङद कटवालले सोही दिनदेखि अवकास पाउँदैछन् भने नेपाली सेनाले उनको सम्मानमा भदौ १९ गते बिदाई भोजको आयोजना गरेको छ। नेपाली सेनाका सैनिक सचिव सहायक रथी विकासक्रम शाहको पदावधि तीन वर्ष थप्ने निर्णय पनि मन्त्रिपरिषदले गरेको छ।सैनिक सचिव शाहको बुधबारदेखि पदावधि सकिदैं थियो। यसैगरी महासेनानी तेजमान सिंह बस्नेत र कृष्ण शम्शेर थापाको दुई वर्षे म्याद थप गर्ने निर्णय पनि मन्त्रिपरिषद बैठकले गरेको छ।मन्त्रिपरिषदले राष्ट्रिय खेलकुद परिषदको सदस्यमा हरीबाबु चौधरीलाई मनोनित गरेको छ। लामो समयदेखि सदस्य सचिव रिक्त रहेको परिषदमा तराई मधेश लोकतान्त्रिक पार्टीका तर्फबाट चौधरीलाई नियुक्त गरिएको हो। उनलाई सदस्य सचिवमा नियुक्त गर्ने युवा तथा खेलकुद मन्त्री गणेश नेपालीले जानकारी दिएका छन्।मन्त्रिपरिषदले सरकार गठनको सय दिन पुगेको उपलक्ष्यमा सरकारले गरेका काम कारबाहीको फेहरिस्त तयार पार्ने निर्णय पनि गरेको छ। अर्को साता सरकार गठनको एक सय दिन पुग्न अगावै सबै मन्त्रीहरुले सय दिनको कामका विवरण मन्त्रिपरिषदमा पठाउने निर्णय पनि बुधबार भएको छ।मन्त्रिपरिषदले सिंहदरबार वैद्यखानाको अध्यक्षमा रामचन्द्र अधिकारीलाई नियुक्त गरेको छ। शिक्षा मन्त्री रामचन्द्र कुशवाहाको अध्यक्षमा शिक्षा सेवा आयोगमा सदस्यहरु नियुक्तिका लागि सिफारिस समिति गठन गर्ने निर्णय भएको छ। सो समितिमा त्रिभुवन विश्वविद्यालयका उपकूलपति र शिक्षा सचिव सदस्य रहने छन।मन्त्रिपरिषद् बैठकले विज्ञान तथा प्रविधि मन्त्रालयको सल्लाहकारमा डा. केदारचन्द्र शर्मालाई नियुक्त गर्ने निर्णय पनि गरेको छ।सरकारका प्रवक्ता एवं सूचना तथा सञ्चार मन्त्री शंकर पोखरेलका अनुसार बैठकमा बाढी पहिरोबाट विस्थापित भएकाहरुका लागि पुनर्स्थापना गर्न सम्बन्धित मन्त्रालयहरुबाट कार्ययोजना बनाउन पनि आग्रह गर्ने निर्णय भएको छ।मन्त्रिपरिषदको बैठकले उपराष्ट्रपतिको सपथ ग्रहणबारे निकास खोजिने बताइएको भए पनि यसबारे कुनै छलफल नभएको मन्त्री पोखरेलले बताए।