सपथ प्रकरणबारे मधेशी दलहरुले छलफल गर्ने

लिम्वूवान डट व्लगस्पोट डटकम,काठमाडौं

भदौ ९ प्रधानमन्त्री माधवकुमार नेपालको अनुरोधपछि मधेशबादी सत्तारुढ दलहरु सपथ प्रकरणका बारेमा समान धारणा बनाउन मंगलबार दिउसो छलफल गर्दैछन्। प्रधानमन्त्री नेपालले मंगलबार बिहान तराई मधेश लोकतान्त्रिक पार्टीका अध्यक्ष महन्त ठाकुरलाई बालुवाटारमा भेटेर सपथ प्रकरणको सकारात्मक अन्त्य गरिदिन अनुरोध गरेका थिए। ठाकुर निकट स्रोतका अनुसार प्रधानमन्त्रीले भविष्यमा संविधान संशोधन गरेर भए पनि आफ्नै मातृ भाषामा सपथ लिन व्यवस्था गरिने तर यसपटक उप राष्ट्रपति परमानन्द झालाई नेपालीमा नै सपथ लिने व्यवस्था गरिदिन ठाकुरलाई अनुरोध गरेका थिए।प्रधानमन्त्रीको अनुरोधका विषयमा छलफल गर्न मधेशीदलहरु मधेशी जनाधिकार फोरम लोकतान्त्रिक, तराई मधेश लोकतान्त्रिक पार्टी र सद्‌भावना पार्टीबीच मंगलबार अपरान्ह छलफल हुन लागेको हो।फोरम लोकतान्त्रिकका नेताले नेपालीमा नै सपथ लिनुपर्ने अदालतको निर्णयलाई सम्मान गर्नुपर्ने बताउँदै आएको छ भने तमलोपा र सद्‌भावनाले हिन्दीको सपथलाइ नै मान्यता दिनुपर्ने अडान व्यक्त गर्दै आएका छन्।विपक्षी मधेशी जनअधिकार फोरमले भने नेपालीमा सपथ लिनुको साटो पदबाट राजिनामा दिन उप राष्ट्रपतिलाई अनुरोध गरिसकेको छ।सर्वोच्च अदालतले उप राष्ट्रपति झाले आगामी आइतबारसम्म नेपालीमा सपथ नलिए उनको पद रिक्त हुने फैसला गरेको छ।