प्रारम्भिक मस्यौदासहितको प्रतिवेदनमाथि छलफल संविधानसभामा

लिम्वूवान डट व्लगस्पोट डटकम,काठमाडौं

संविधानसभाको बिहीबार बसेको बैठकमा मौलिक अधिकार तथा निर्देशक सिद्धान्त समितिले पेस गरेको अवधारणापत्र र प्रारम्भिक मस्यौदासहितको प्रतिवेदनमाथि छलफल भएको छ ।यसअघि नै दुई दिन भइसकेको छलफल बजेट पारित गर्न तीन दिनका लागि स्थगित गरिएको थियो । संविधानसभा सचिवालयका अनुसार बिहीबार, शुक्रबार र शनिबार समितिको मस्यौदा प्रतिवेदनमाथि छलफल हुनेछ । बिहीबारको छलफलमा भाग लिँदै एकीकृत माओवादीकी सभासद् हिसिला यमीले नयाँ संविधानमा स्वच्छ खानेपानी, आवास तथा गृहको हक राखिनुपर्ने बताइन् । उनले तेस्रो लिंगीलाई भेदभावविरुद्धको हक पनि समितिले तयार गरेको मस्यौदामा थप्नुपर्ने सुझाब दिइन् ।कांगे्रस सभासद् पुष्पा भुसालले नेपाली आमाबाट जन्मेका सन्तानलाई निसर्त नागरिकता दिनुपर्ने बताइन् । एमाले सभासद् रवीन्द्र अधिकारीले अपांगको अधिकारलाई विशेष अधिकारका रूपमा राख्नुपर्ने बताए ।यसअघि संविधानसभामा सातवटा विषयगत समितिको प्रतिवेदनमाथि छलफल भइसकेको छ । संवैधानिक समिति, राज्यको शासकीय स्वरूप निर्धारण समिति र राज्य पुनर्संरचना तथा राज्य शक्तिको बाँडफाँड समितिले भने अझै मस्यौदा तयार गर्न सकेका छैनन् ।