आदिवासी/जनजाति वृहत मोर्चा आन्दोलनदेखि विद्रोहसम्म हुने

लिम्वूवान डट व्लगस्पोट डटकम,काठमाडौं/ डी बी आङ्बुङ

नोभेम्बर २१, २००९,संघीयता, लोकतान्त्रिक गणतन्त्र, आदिवासी/जनजातिहरुको आत्मनिर्णयको अधिकार, जातीय स्वायत्तता, स्वशासन, व्यक्तिगत तथा सामुदायिक अधिकारको सुनिश्चिताको लागि आदिवासी/जनजाति वृहत भेला पूर्व गठित सो भेलाको लागि पहलकर्ता टोलीको आयोजनामा मंसिर ६, २०६६ का दिन चुम्लुङहिम ललितपुरमा मोर्चाको आधारभूत सहमति-पत्र र सञ्चालनको कार्यविधिसमेत पास गरी आदिवासी/जनजाति वृहत मोर्चा, नेपालको निर्माण गरिएको छ ।यो मोर्चाको गठन विगत ३ महिनादेखिको अभ्यासपछि भाद्र २७ र असोज ५ मा तय गरिएको कार्यक्रम, घोषणा-पत्र र डा. कृष्ण भट्टचनको संयोजकत्मा बनेको सात सदस्यीय पहलकर्ता टोलीको पहल, आयोजना र लाहुर्निप, नेपाल; आदिवासी जनजाति महासंघ, आदिवासी जनजाति उत्थान राष्ट्रिय प्रतिष्ठान, आदिवासी जनजाति गैर सरकारी संस्था महासंघ, सिड्स र महिला महासंघलगायतका संघ संस्थाहरुको सहयोगमा निर्माण गर्न सम्भव भएको हो ।नव गठित आदिवासी/जनजाति वृहत मोर्चा, नेपालमा प्रत्येक आदिवासी/जनजाति राजनीतिक संगठन, जातीय संगठन तथा जातीय संघ संस्था र आदिवासी बुद्धिजिवीबाटसमेत एक पुरुष र एक महिला रहने गरी १०० भन्दा बढी सदस्य रहेको संयुक्त परिषद् र डा. कृष्ण भट्टचन सचिव तथा अन्य पाँच जना अध्यक्ष मण्डल सदस्य रहेको २७ सदस्यीय संघर्ष समितिको समेत चयन गरिएको छ । सो मोर्चामा आदिवासी/ जनजातिको सवालाई प्रमुख मुद्दा बनाएरु राजनीति गर्ने राजनीतिक संगठनका नेताहरु लक्ष्मण थारु, कुमार लिङ्देन र सञ्जुहाङ पालुङवासमेत रहेका छन् । यसमा लिम्बुवान, खम्बुवान, तामाङसालीङ र थरुहटको समेत सहभागिता रहेको छ । यस मोर्चाले तत्कालै आफ्नो आन्दोलनको कार्यक्रम तय गरेर सरकारलाई ज्ञापन-पत्र बुझाई दवाब, बन्द, आम हड्ताल र नयाँ बन्ने संविधानमा आदिवासी जनजातिको मागलाई सुनिश्चित नगरिएमा सो संविधानलाई अस्वीकार गरी आदिवासी विद्रोहसम्मको आन्दोलन गर्ने जनाइएको छ । यो मोर्चा गठनका लागि भेला आयोजनाको पहलकर्ता टोलीमा डा. कृष्ण भट्टचन, शान्ति राई, नन्द कन्दङ्वा, मल्ल के सुन्दर, सुरेश आले मगर र ज्योति दनुवार रहनुभएको थियो ।