एमालेका अध्यक्ष झलनाथ खनालले राजीनामा नदिने स्पष्ट

लिम्वूवान डट व्लगस्पोट डटकम,काठमाडौं

२८नोभेम्बर,२००९, नेकपा (एमाले)का अध्यक्ष झलनाथ खनालले केही नेताहरुले आफ्नो राजीनामा माग्दैमा आफूले नदिने स्पष्ट पार्नुभएको छ । राजधानीमा आज शनिबार सञ्चारकर्मीहरुसँग कुराकानी गर्दै अध्यक्ष खनालले कसैले राजीनामा माग्दैमा नपाइने बताउनुभयो । उहाँले भन्नुभयो- राजीनामा माग्दैमा पाइने बिषय होइन । त्यसका लागि निश्चित प्रक्रिया हुन्छ । एमालेलाई आफ्नो कार्यकालमा नमूना पार्टी बनाउने प्रतिवद्धता पनि उहाँले व्यक्त गर्नुभयो । उहाँले पार्टी एक ढिक्का बनाउने दृढता समेत व्यक्त गर्नुभयो । केही समय अगाडि सिंगापुरमा नेपाली काँग्रेसका सभापति गिरिजाप्रसाद कोइराला र एकीकृत माओवादीका अध्यक्ष प्रचण्डबीच कुनै सहमति नभएको उहाँको भनाई थियो । दुई नेताबीच सत्ता समीकरण परिवर्तनमा सहमति भएको भन्ने हल्लालाई आफूले विश्वास नगरेको उहाँको भनाई थियो । उहाँले दुई नेताबीच सिंगापुरमा भएको वार्ताको टेप सार्वजनिक भएको भन्ने हल्ला वाहियात भएको टिप्पणी समेत गर्नुभयो । उहाँले दलहरुबीच सहमति हुनुपर्ने कुरा दोहोर्‍याउँदै दलहरुबीच सहमति भए जे कुरा पनि सजिलै गर्न सकिने बताउनुभयो ।