बोक्सीका आरोपी महिलाहरू राज्यमन्त्रीव्दारा सम्मानित

लिम्वूवान डट व्लगस्पोट डटकम,काठमाडौं

लहान, फागुन २४,गृह राज्यमन्त्री रिजमान अन्सारीले बोक्सीको आरोपमा मलमूत्र खुवाइएका १५ महिलालाई सोमबार एक समारोहमा सम्मान गरेका छन्।सिरहामा अहिलेसम्म १५ महिलालाई बोक्सीको आरोपमा मलमूत्र खुवाइएको तथ्यांक सार्वजनिक गरिएको छ। हिंसापीडित महिलाले गृह राज्यमन्त्री अन्सारीलाई ज्ञापनपत्र बुझाएका छन्। ज्ञापनपत्रमा कानुनमा दण्डनीय उल्लेख गरिए पनि राज्यले कडाइका साथ लागू नगरेकोले महिला हिंसा बढेको उल्लेख छ। घरेलु हिंसा ऐन २०६६ बाट समुदायमा मिलाउने प्रावधान हटाई हिंसाका सबै घटनालाई कानुनी दायरामा ल्याउने अनिवार्य व्यवस्था गर्न सरकारसँग माग गरिएको छ।बोक्सीको आरोपमा महिला प्रताडित हुनुको कारण पीडकमाथि कडा कारबाही गर्न कानुनको अभाव रहेको महिला हिंसाविरुद्धको अभियानकर्ता सम्झना थपलियाले बताउँछिन्। उनका अनुसार सिरहामा मात्र १८ महिनाभित्र १३ जना महिलामाथि बोक्सीको आरोप लगाएर मलमूत्र खुवाइएको छ। यी महिलालाई मलमूत्र खुवाउने कसैलाई कारबाही नभएको उनको भनाइ छ। राज्यमन्त्री अन्सारीले काठमाडौं फर्किएलगत्तै गृहसचिवलाई बोलाएर ७५ वटै जिल्लाका प्रमुख जिल्ला अधिकारीलाई महिलामाथि हिंसा गर्नेलाई कडा कारबाही गर्न निर्देशन दिने दृढता व्यक्त गरे।१८ महिनाभित्र सिरहामा बोक्सीको आरोपमा सिरहा अर्नामाकी सीतादेवी महतो, कर्जन्हाकी रीतादेवी साह, कर्जन्हा-८ की रधियादेवी साह, लहानकी आशादेवी राय, लहानकी राजोदेवी राय, भदैयाकी नुरजहान खातुन, दुर्गापुर-४ की गंगियादेवी महतो, दुर्गापुर-४ की अमिनकुमारी महतो, मुक्सारकी रासोदेवी यादव, सिरहा-६ बसपीटाकी चन्द्रकदलादेवी साह र बस्तीपुरकी जागीदेवी रामलाई बोक्सीको आरोपमा मलमूत्र खुवाइएको हो।बोक्सीको आरोपमा पीडित यी महिलालाई गृह राज्यमन्त्री अन्सारीले दोसल्ला ओढाएर सम्मान गरे।