राष्ट्रिय सहमतिको सरकार गठन गर्न राष्ट्रपतिको सुझाव

लिम्वूवान डट व्लगस्पोट डटकम,काठमाडौं

राष्ट्रपति रामवरण यादवले प्रधानमन्त्री बाबुराम भट्टराईलाई राष्ट्रिय सहमतिको सरकार गठन गरी संविधान जारी गर्न सुझाव दिएका छन् । आज राष्ट्रपतिलाई भेट्न शितल निवास पुगेका प्रधानमन्त्रीलाई राष्ट्रपतिले राष्ट्रिय सहमतिको सरकारमा सबै दल समावेश भएपछि संविधान जारी गर्न सहज हुने बताएका हुन् । प्रधानमन्त्री भट्टराईले सहमतीय सरकार आफ्नो एजेन्डा भएकोले त्यसको लागि अहिलेसम्म पनि आफू त्यसको लागि प्रयत्नरत रहेको बताएका छन् । प्रधानमन्त्रीका प्रेस सल्लाहकार रामरिझन यादवका अनुसार प्रधानमन्त्रीले शान्ति प्रक्रियामा भएको प्रगति तथा संविधान निर्माणका विषयमा दलहरुबीच भइरहेको छलफलको बारे राष्ट्रपतिलाई जानकारी गराएका छन् । संविधानमा भइरहेको सहमतिको प्रयास बारेमा राष्ट्रपतिले विशेष चासो राखेका थिए । दुई दिनको छलफलबाट राज्यको पुनसंरचना, शक्तिको बाँडफाँट, नागरिकता, न्यायपालिका लगायतका विषयमा सहमतिको धैरै नजिक पुगेको प्रधानमन्त्रीले राष्ट्रपतिलाई जानकारी गराएका हुन् ।