दलहरुबीच विवादित विषयमा सहमति जुटेन

लिम्वूवान डट व्लगस्पोट डटकम,काठमाडौं 

 वैशाख १८ - मधेसी मोर्चासहित प्रमुख तीन राजनीतिक दलका बीचमा भएको सोमबारको वार्ता विना निष्कर्ष टुंगिएको छ । संविधान जारी गर्न २८ दिन मात्र बाँकी रहँदा दलहरू शासकीय स्वरूप र संघीयतामा सहमत हुन सकेका छैनन् । बैठक स्थलबाट बाहिरिँदै एमाले अध्यक्ष झलनाथ खनाले भने, 'विवाद समाधानमा भन्दा सबैले आआफ्नै डम्फु बजाउनतिर लागेकाले कुनै निकास निस्कन सकेन, बरु सहमति भन्दा विमतिको बाटो पो बलियो देखियो ।' कांग्रेस नेता अर्जुन नरसिंह केसीका अनुसार संविधानसभाको मतदान प्रक्रियामै गएर समस्याको निकास खोज्ने सम्भावना बढेको छ । उनले भने, 'बैठकमा कुनै सकारात्मक निर्णय भएनन् बरु दलहरुबीच अविश्वास बढेको अनुभूति भयो ।' मंगलबार बस्ने संविधानसभाको बैठकमा विवादित विषयले प्रवेश पाउने सम्भावना बढेको उनले बताए । सहमति र संवैधानिक प्रक्रिया एकै साथ अगाडि बढ्नसक्ने उनको ठम्याइ थियो । विवादित विषयलाई सामान्य बहुमतबाट निकास दिए पनि अन्तरिम संविधान २०६३ का अनुसार संविधान जारी गर्न दुई तिहाइ बहुमत आवश्यक पर्ने भएकाले सहमति र मतदानको प्रक्रिया एकैसाथ बढाउने प्रयासमा दलहरु पुगेका हुन् ।