चितवनमा मापसे जाँच गर्ने अभियान पनि शुरु

लिम्वूवान डट व्लगस्पोट डटकम,काठमाडौं 

राजधानीबाट केही महिनाअघि शुरु भएको मादक पदार्थ सेवन मापसे गरे नगरेको जाँच गर्ने अभियान चितवनमा पनि शुरु भएको छ। मादक पदार्थ सेवन गरेर सवारी साधन हाक्नेहरुलाई निरुत्साहित गरी सम्भावित दुर्घटना कम गराउने उद्देश्यले जिल्ला ट्राफिक प्रहरी कार्यालय चितवनले बिहीवार रातिबाट मापसे अभियान शुरु गरेको हो। चितवनका ट्राफिक प्रमुख कृष्णदेव भट्टको नेतृत्वमा रहेको टोलीले राति ८ वजे भरतपुर चौविसकोठीबाट व्रेथलाइजरको माध्यमवाट मापसे जाँच अभियान शुरु गरेको हो। सडकमा गुडेका मोटरसाइकल, साना तथा ठूला सवारी साधन रोक्दै मापसे जाँच गर्न थालेपछि केहीबेर सो क्षेत्रमा सवारी चलाउनेहरु भागाभाग गरेका थिए। जिल्लामा पहिलोपटक शुरु गरिएको अभियान अन्तर्गत पहिलो दिन आठ जना सवारी चालक कारवाहीमा परेको ट्राफिक प्रमुख भट्टले बताए। उनीहरुलाई रातभर प्रहरी कार्यालयमा राखेर शुक्रवार विहान परिवारको जिम्मा लगाइएको थियो। मापसे जाँच अभियान अब दैनिक रुपमा संचालन गरिने ट्राफिक कार्यालयले जनाएको छ। यो अभियानसगै चितवनमा सवारी दुर्घटनामा कमी आउने प्रहरीको विश्वास छ।