तराई बन्दले जनजीवन प्रभावित

लिम्वूवान डट व्लगस्पोट डटकम,काठमाडौं 

 नेपाल आदिवासी जनजाति महासंघको आह्वानमा गरिएको तराई बन्दले आज जनजीवन प्रभावित भएको छ । पूर्वी तराईको मोरङ, सुनसरी, झापा लगायतका जिल्लाका मुख्य बजारहरु बन्द रहनुका साथै मुख्य तथा सहायक राजमार्गमा यातायातका साधन चलेका छैनन् । सडकमा अति आवश्यकीय सवारी साधनहरु भने चलेको छन् । बन्दका कारण यस क्षेत्रका शिक्षण संस्था बन्द भएका छन् । केहि छुटफुट रुपमा पसलहरु खुलेपनि बजार पूर्ण रुपमा बन्द रहेका छन् । बन्दकर्ताहरुले बिहानैदेखि मुख्य मुख्य चोकमा भेला भएर बन्द गराइरहेका छन् । आदिवासी जनजाति महासंघले जातीय राज्यसहितको संविधान जारी गर्नुपर्ने, तोकिएकै समयमा संविधान जारी गर्नुपर्ने, संवैधानिक समितिलाई निर्णयक बनाउनु पर्ने जस्ता मागहरु राख्दै एक दिने तराई बन्द आह्वान गरेको हो । यसैबीच इटहरी बजारका पसलहरु बन्द गराउँदै हिडेका आठ बन्दकर्तालाई प्रहरीले आफ्नो नियन्त्रणमा लिएका छन् । यस्तै दाङको घोराहीमा बन्दकर्ताले एक दूध बोकेको ट्रकमाथि तोडफोड गरेका छन् । जिल्ला प्रहरी कार्यालय दाङका अनुसार बन्दकर्ताले बा ७ च २८१७ नम्बरको ट्रकको सिसा फुटाइदिएका थिए । सो तोडफोडमा संग्लन ९ जनालाई नियन्त्रणमा लिएको पनि जिल्ला प्रहरी कार्यालयले जनाएको छ ।