तेस्रो दिन पनि सुदूरपश्चिम बन्द, बन्दले जनजीवन कष्टकर

लिम्वूवान डट व्लगस्पोट डटकम,काठमाडौं 

 धनगढी, वैशाख १७-राज्य पुनःसंरचना गर्दा सुदूरपश्चिमलाई टुक्र्याउन नहुने मागसहित तीन दिनदेखि जारी सुदूरपश्चिम बन्दका कारण यस क्षेत्रको जनजीवन कष्टकर बन्दै गएको छ। तेस्रो दिन आज पनि सुदूरपश्चिममा व्यापार-व्यवसाय, यातायात, शैक्षिक क्षेत्र ठप्प हुँदा जनजीवन कष्टकर बनेको हो। बन्दका कारण दैनिक मजदुरी गरेर जीविका चलाउने वर्ग सबैभन्दा बढी मारमा परेका छन्। दैनिकजसो भइरहेका बन्दका कारण दैनिक उपभोग्य वस्तुसमेत सहजरुपमा उपलब्ध हुन नसक्दा समस्या थपिएको उपभोक्ताहरुले बताएका छन्। सुदूरपश्चिमको मुख्य व्यापारिक केन्द्र धनगढीमा बन्दका कारण व्यापार-व्यवसाय ठप्प हुँदा दैनिक करोडौँ रुपैयाँ क्षति हेने गरेको व्यापारीहरु बताउँछन्। बन्दका क्रममा बन्द समर्थक सर्वसाधारणले दिनहुँ स्थानीय बजारमा अखण्ड सुदूरपश्चिमको पक्षमा नाराबाजी गर्दै प्रदर्शन गरिरहेका छन्। एकीकृत माओवादीबाट सुदूरपश्चिमलाई टुक्र्याउने गरी राज्य पुनःसंरचनाको प्रस्ताव ल्याएको भन्दै सुदूरपश्चिम एकता समाजको नेतृत्वमा बन्द आह्वान गरिएको हो।