बस दुर्घटनामा ११ को मृत्यु, तीन जनाको सनाखत

लिम्वूवान डट व्लगस्पोट डटकम,काठमाडौं

सिन्धुली/भक्तपुर, वैशाख २० - सिन्धुलीको खुर्कोटबाट काभ्रेको बनेपा आउँदै गरेको यात्रुबाहक बस मंगलबार बिहान दुर्घटनाग्रस्त हुँदा ११ जनाको मृत्यु भएको छ । वीपी राजमार्ग अन्तर्गत काभ्रेको रिठ्टेमा बा २ ख ३३७५ नम्वरको बस दुर्घटनामा घाइते १४ मध्ये ८ जनाको अवस्था गम्भीर छ । दुर्घटनामा मृत्यु भएकामध्ये तीन जनाको सनाखत भएको सिन्धुलीका सहायक प्रमुख जिल्ला अधिकारी विमल पोखरेलले जानकारी दिए । उनका अनुसार अहिलेसम्म सिन्धुलीको श्रीजंग गणका अमल्दार शिवबहादुर कार्की, पुनारो झागाझोलीका श्याम बस्याल र रामेछाप भीरपानी- ७ का आइती माझीकोमात्र सनाखत भएको छ । सडकबाट खसेको बस भीरमा अड्किँदा च्यापिएर १० जनाको घटनास्थलमै र एक जना बालिकाको उपचारका लागि धुलिखेल अस्पताल ल्याउँदै गर्दा मृत्यु भएको हो । बिहानभर पानी परेकाले उद्धारमा कठिनाइ भएको थियो । दुर्घटनामा घाइतेको धुलिखेल अस्पतालमा उपचार भइरहेको छ । अलिहे पनि स्थानीयवासी, नेपाली सेना र प्रहरीले उद्धार गरिरहेका छन् । क्षतिग्रस्त मिनिबस काभ्रे सेवा समितिको हो ।