अवैध रूपमा टेलिफोन सेवा सञ्चालन गर्ने पाँच जना पक्राउ

लिम्वूवान डट व्लगस्पोट डटकम,काठमाडौं

अवैध रूपमा उपकरणहरू प्रयोग गरी टेलिफोन सेवा सञ्चालन गरेर राजस्वसमेत छल्दै आएका पाँच जनालाई प्रहरीले बिहीबार पक्राउ गरेको छ । जिल्ला प्रहरी कार्यालयबाट गएको टोलीले विराटनगरका गुन्द्रि चोक, तीनटोलियालगायतका क्षेत्रका टेलिफोन सेन्टरहरूमा छापा मारी १७ वटा टेलिफोन सेट, ९ थान एन्टेना, १६ थान इन्डियन सिम, सात थान रिचार्जकार्ड र एन्टेनामा प्रयोग गर्ने एक बन्डल तारसहित उनीहरूलाई पक्राउ गरेको हो । पक्राउ पर्नेहरूमा प्रभु पान पसल रानीका सञ्चालक प्रभु शाह, तुलसी टेलिफोन सेवा तीनटोलियाका सञ्चालक निसान लिम्बू, विराटनगर-१४ मा रहेको महालक्ष्मी पान पसलका विनोद भगत र शिव गुरु टेलिफोन सेवाका सचिन शाह र महालक्ष्मी कम्युनिकेसन गुद्रीका सञ्चालक दिलीप भगत रहेका छन् । प्रहरीले बिहीबार दिनभरि संयुक्त टोली परिचालन गरी टेलिफोन पसलमा छापा मारेर छानबिन गरी उनीहरूलाई पक्राउ गरेको थियो । पक्राउ गरिएका सबैलाई ऐनअनुसार कारबाही गरिने प्रहरीले जनाएको छ ।