एमालेले गरेको आन्दोलनका कारण आज दोस्रो दिन पनि सिरहा बन्द

लिम्वूवान डट व्लगस्पोट डटकम,काठमाडौं

जिल्लामा आपराधिक घटनामा वृद्धि भएको विरोधमा एमालेले गरेको आन्दोलनका कारण आज दोस्रो दिन पनि सिरहा बन्द भएको छ। बन्दका कारण सार्वजनिक यातायात चलेका छैनन्। एमाले कार्यकर्ताले पूर्व पश्चिम राजमार्ग अन्तर्गत मिर्चैया र लहानमा ढाट तेर्साएर यातायात चल्नमा रोक लगाएका छन्। पक्राउ परेका कार्यकर्ताको रिहाइ, छेदि यादव हत्या, बेल्हा डाँका काण्डको न्यायिक छानबिन लगायत आठ सूत्रीय माग राखि सिरहा एमाले दुई महिनादेखि चरणबद्ध आन्दोलनमा छ। यसैबीच एमालेकै माग अनुसार सरकारले गठन गरेको छानबीन समितिले घटनाबारे छानबीन गरी राजधानी फर्किसकेको छ। सरकारले सिरहामा भएका विभिन्न घटनाको छानबीन गर्न कारागार व्यवस्था विभागका प्रमुख दुर्गा भण्डारीको संयोजकत्वमा नेपाल प्रहरीका डिआइजी केशव शाही र राष्ट्रिय अनुसन्धान विभागका निर्देशक दिलिप रेग्मी सदस्य रहेको समिति गठन गरेको थियो। यता सिरहाका प्रमुख जिल्ला अधिकारी ध्रुव ढकालले बन्द खुलाउन केन्द्रको निर्देशन पर्खेर बसेको बताए।