२ सय ११ जना प्रहरी कारबाहीमा

लिम्वूवान डट व्लगस्पोट डटकम,काठमाडौं

हेटौंडा, फाल्गुन ४ - अनुशासनहीन र कर्तव्य पालन नगर्ने विभिन्न तहका २ सय ११ जना प्रहरीलाई मध्य क्षेत्र प्रहरी कार्यालय हेटौंडाले कारबाही गरेको छ । मध्य क्षेत्र प्रहरी कार्यालय हेटौंडाले बुधबार आयोजना गरेको पत्रकार सम्मेलनमा प्रहरी नायब महानिरीक्षक वीरेन्द्रबाबु श्रेष्ठले भदौ महिनादेखि माघ महिनासम्म कर्तव्यपालन नगर्ने र पदीय मर्यादाविपरीत काम गर्ने एक प्रहरी उपरीक्षकसहित २ सय २४ जनालाई विभिन्न तहको कारबाही गरेको बताए । १६ जिल्ला कार्य क्षेत्र रहेकामध्य क्षत्रीय प्रहरी कार्यालय, हेटौंडाका अनुसार प्रहरी उपरीक्षक, नायब प्रहरी उपरीक्षक र प्रहरी निरीक्षकसहित २४ जनालाई निलम्बन गरेको छ । पत्रकार सम्मेलनमा प्रहरी नायब महानिरीक्षक श्रेष्ठले २ जना प्रहरी जवानलाई बर्खास्ती गरेको र १९ जनालाई नोकरीबाट हटाएको जानकारी गराएका थिए । ६ महिनाको बीचमा १ सय १९ जनालाई नसिहत दिएको पत्रकार सम्मेलनमा जानकारी गराइएको थियो ।