राजविराजको छुट्टाछुट्टै ठाउँमा अज्ञात समूहद्वारा आगजनी

लिम्वूवान डट व्लगस्पोट डटकम,काठमाडौं

राजविराज, माघ २७ सप्तरी सदरमुकाम राजविराजमा शुक्रवार बिहान एक यात्रु बाहक बस सहित दुई पसलमा आगजनी भएको छ । बिहान ३ बजेतिर राजविराजस्थित बसपार्क नजिकै राखिएको स.१ख. ३१४ नम्बरको अन्सारी ट्राभल्समा अज्ञात समूहले आगजनी गरेको हो । आगजनीले बस पूर्णरुपमा क्षतिग्रस्त भएको छ । यता बसमा आगजनी गर्ने एकजना पक्राउ परेका छन् । आगो लगाई त्यही स्थानमा राखिएको अर्को बसमा लुकिबसेको राजविराज ४ का २४ वर्षिय रिजु भनिने अफरोज मियाँलाई बसका कर्मचारीहरुले पक्राउ गरि प्रहरीलाई बुझाएका हुन् । यस्तै राजविराज ४ स्थित बेग्ला बेग्लै दुई पसलमा पनि आगजनी गराएको छ । उमेश साहको पान पसल र राजकुमार साहको चिया पसलमा आगजनी हुँदा करिब दुई लाख बराबरको क्षति भएको छ । आगजनीबाट उमेश साहको चिया पसल पूर्ण रुपले डढेको छ भने उमेश साहको पान पसलमा सामान्य क्षति पुगेको छ । आगजनीबारे जिल्ला प्रहरी कार्यालय सप्तरीका प्रमुख एसपी गणेशबहादुर थापाले अनुसन्धान जारी रहेको र आगजनीमा संलग्नहरुलाई चाँडै पक्राउ गर्ने बताए ।