संसदमा प्रस्तुत विधेयकप्रति माओवादी सचिवको आपत्ति

लिम्वूवान डट व्लगस्पोट डटकम,काठमाडौं

फागुन ५- एकीकृत नेकपा (माओवादी)का सचिव सीपी गजुरेलले व्यवस्थापिका-संसदमा प्रस्तुत सङ्गठित अपराध निवारण विधेयक, पारस्पारिक कानुन सहायता विधेयक र सुपुर्दगी विधेयक राष्ट्रघाति भएकाले आफ्नो पार्टीले पारित हुन नदिने बताएका छन्। शुक्रबार आयोजित साक्षात्कार कार्यक्रममा सचिव गजुरेलले ती विधेयक अर्थ तथा राजनीतिसँग गाँसिएको र नेपालको हितविपरीत भएको स्पष्ट पारे। उनले विधेयक पारित नभए मुलुक कालो सूचीमा पर्ने भन्ने भनाइप्रति विमति जनाउँदै यसको बहानामा दातृसंस्थाले दिने सहायता रोकिन्छ भन्नु भ्रममात्र हो भने। अर्थविद् चिरञ्जीवी नेपालले संसदमा प्रस्तुत विधेयक पारित गरिनुपर्ने अन्यथा दातृसंस्थाले सहायता रोक्न सक्ने भन्दै विधेयक पारित गरी अन्तर्राष्ट्रिय स्तरमा मुलुकको छबि कायम राख्न नसके नेपाल कालोधन सञ्चित गर्ने मुलुक हो भन्ने सन्देश जानसक्छ भने। नेपाली कांग्रेसका नेता अमरेशकुमार सिंहले राज्य संयन्त्र कमजोर रहेको मौका छोपी सत्तासीन दलकै एक गुट विधेयक पारित हुन नदिने प्रयासमा लागेको आरोप बताए। नेकपा एमालेका नेता राजन भट्टराईले तीन वटै विधेयक राष्ट्रहितको पक्षमा रहेको जिकिर गरे।